Konferenca për paqen në Ukrainë: Cilat janë pikat e marrëveshjes dhe kush nuk i pranoi

Pas dy ditësh diskutimesh dhe presioni diplomatik, “Konferenca e nivelit të lartë për paqen në Ukrainë”, e organizuar nga qeveria federale zvicerane dhe lideri ukrainas Volodymyr Zelensky, në Bürgenstock, përsëriti disa pika fikse.

Ajo do të sigurojë një pikënisje të mirë për çdo negociatë të ardhshme me Rusinë.

Por mbi të gjitha ishte rasti i parë në të cilin krerët e shteteve dhe qeverive në nivelin më të lartë u takuan për të diskutuar konfliktin.

Cilat janë pikat e marrëveshjes?

Deklarata kryesore është në fund të tekstit ku thuhet se “respektimi i integritetit territorial dhe sovranitetit të të gjitha shteteve” do të jetë baza “për arritjen e paqes në Ukrainë”.

Dokumenti më pas nënvizon se “centrali bërthamor i Zaporizhzhia-s duhet të funksionojë në mënyrë të sigurtë “nën kontrollin e plotë të Ukrainës”.

Ai përsërit se “çdo kërcënim ose përdorim i armëve bërthamore në kontekstin e luftës së vazhdueshme kundër Ukrainës është i papranueshëm”.

Siguria ushqimore, lundrimi komercial falas dhe qasja në portet detare në Detin e Zi dhe Detin Azov janë gjithashtu thelbësore.

Një pasazh i rëndësishëm është ai kushtuar robërve të luftës që “duhet të lirohen”.

Si duhet të kthehen në shtëpi “fëmijët e dëbuar ukrainas dhe të gjithë civilët e tjerë ukrainas të ndaluar ilegalisht”.

Kush votoi dhe si?

Nga 92 vendet pjesëmarrëse në Konferencë, 80 e nënshkruan dokumentin, duke përfshirë Turqinë, e cila, që nga fillimi i konfliktit, është përpjekur të veprojë si ndërmjetëse midis Rusisë dhe Ukrainës.

Në mesin e atyre që refuzuan të miratojnë draftin përfundimtar dhe që besojnë dukshëm se kufijtë e vendeve sovrane mund të modifikohen në mënyrë arbitrare dhe madje edhe me armë, ka vende vendimtare si India, Arabia Saudite, Afrika e Jugut, Meksika dhe Indonezia që përfaqësojnë pak më pak se dy miliardë njerëz.

Armenia, Bahreini, Kolumbia, Jordania, Libia, Tajlanda dhe Emiratet e Bashkuara Arabe kompletojnë listën.

Këtyre duhen shtuar Brazili dhe Vatikani, të cilët megjithatë morën pjesë si “vëzhgues”, gjithsej ishin 101 delegacione.

Cili ishte pozicioni i Brics?

Ato që kundërshtojnë deklaratën përfshijnë disa vende nga Brics, grupimin e ekonomive botërore në zhvillim të përbërë nga Brazili, Rusia, India, Kina, Afrika e Jugut, Egjipti, Etiopia, Irani dhe Emiratet e Bashkuara Arabe.

Brazili (si vëzhgues), India, Afrika e Jugut dhe Emiratet e Bashkuara Arabe ishin të pranishëm në Konferencën e Paqes.

Cilat do të jenë hapat e ardhshëm?

Takimet do të vazhdojnë në nivelin e ministrave për çështjet humanitare, sigurimin e termocentralit bërthamor të Zaporizhzhia dhe garancitë për fluksin e eksporteve të ushqimit ukrainas.

Ekziston edhe propozimi për të organizuar një konferencë të dytë me munguesit kryesorë: Rusinë dhe Kinën.

Arabia Saudite ka aplikuar për të qenë vendi pritës.

Marrë nga “Corriere Della Sera”, përshtatur për Albanian Post 

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.