Kanadaja do të përdorë asetet e sekuestruara ruse për të ndihmuar viktimat e Ukrainës

Kanadaja po ecën përpara me përpjekjet për të miratuar legjislacionin që do t’i lejonte asaj të rishpërndante asetet e sekuestruara ruse për të kompensuar viktimat e luftës në Ukrainë, tha Ministrja e Jashtme kanadeze Melanie Joly.

Duke folur me gazetarët në kryeqytetin Otava, Joly tha se Kanadaja do të bëhet vendi i parë i industrializuar i G7-ës që do të lejojë konfiskimet e aseteve të tilla dhe po u propozon aleatëve të ndjekin të njëjtin shembull.

“Kishte një hallkë të dobët në paketën tonë të sanksioneve, që ishte aftësia e qeverisë për të qenë në gjendje të shesë asetet që u sekuestruan dhe më pas të përdorë fitimet për të kompensuar viktimat e kësaj lufte kundër Ukrainës”, tha ajo.

Joly shtoi se ndryshimet e propozuara në regjimin e sanksioneve të Kanadasë, të cilat u përshkruan për herë të parë në një projekt-ligj për zbatimin e buxhetit të prezantuar të martën, “do të shkojnë shumë” në adresimin e kësaj çështjeje.

Komentet e saj erdhën pasi Kanadaja vendosi sanksione të reja ndaj 203 personave të akuzuar si bashkëpunëtorë në përpjekjet e presidentit rus Vladimir Putin, për të aneksuar zona në rajonin lindor të Donbasit në Ukrainë.

“Kanadaja nuk do të qëndrojë duarkryq”

Forcat ruse nisën një ofensivë të re në atë pjesë të vendit këtë muaj, duke nxitur Ukrainën t’u bëjë thirrje aleatëve të saj që të dërgojnë armë të rënda për ta ndihmuar atë të mbrohet kundër shtytjes së Moskës. Kanadaja, Shtetet e Bashkuara dhe vende të tjera kanë premtuar të dërgojnë më shumë armë.

“Kanadaja nuk do të qëndrojë duarkryq dhe të shikojë presidentin Putin dhe bashkëpunëtorët e tij duke u përpjekur të rishikojnë kufijtë e Ukrainës pa u ndëshkuar”, tha Joly.

Ndërkohë, parlamenti kanadez ka nisur debatin për masën e pasurive të sekuestruara dhe votimin e amendamenteve të propozuara.

Ndryshimet që Kanada synon të sjellë në ligjin e saj të sanksioneve do të nënkuptojnë se fondet ose pronat e sekuestruara nga Rusia mund të paguhen për të ndihmuar në rindërtimin e Ukrainës ose atyre të prekur nga pushtimi i Rusisë.

Javën e kaluar, Putin tha se breshëria e sanksioneve perëndimore të vendosura kundër Moskës që kur ajo filloi pushtimin e saj të plotë të Ukrainës kishte dështuar.

Presidenti rus deklaroi se kombet perëndimore “pritnin të shqetësonin shpejt situatën financiaro-ekonomike, të provokonin panik në tregje, kolapsin e sistemit bankar dhe mungesa në dyqane”, por në vend të kësaj politikat e tyre kanë çuar në një “përkeqësim të ekonomisë në Perëndim”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.