Greta Thunberg arrestohet nga policia norvegjeze gjatë protestës pro-Sami

Greta Thunberg është arrestuar dy herë gjatë një demonstrate në mbështetje të të drejtave të indigjenëve në Oslo, me policinë që e largoi atë dhe aktivistët e tjerë.

Thunberg iu bashkua protestuesve duke kërkuar heqjen e 151 turbinave me erë nga kullotat e drerëve të përdorura nga barinjtë Sami në Norvegjinë qendrore.

Ata thonë se një kalim në energjinë e gjelbër nuk duhet të bëhet në kurriz të të drejtave indigjene.

Ditët e fundit, demonstruesit kanë bllokuar hyrjen në disa ndërtesa qeveritare, duke e vendosur qeverinë e pakicës së qendrës së majtë në një gjendje krize dhe duke bërë që ministri i Energjisë Terje Aasland të anulojë një vizitë zyrtare në Britani.

Gjykata e Lartë e Norvegjisë vendosi në vitin 2021 se turbinat, të ngritura në dy ferma me erë në Fosen dhe pjesë e kompleksit më të madh të energjisë së erës në tokë në Evropë, shkelën të drejtat e Sami-t sipas konventave ndërkombëtare.

Por ato mbeten në funksion më shumë se 16 muaj më vonë.

Thunberg, duke mbajtur një flamur Sami, u ngrit dhe u mor nga oficerët e policisë teksa qindra demonstrues brohorisnin parulla.

“Ne duam ta bëjmë shumë të qartë se është shteti norvegjez ai që po kryen krimin e vërtetë këtu, për shkeljen e të drejtave të njeriut”, ka thënë ajo disa minuta përpara se të largohej.

Thunberg dhe demonstruesit e tjerë më vonë bllokuan hyrjen në ministrinë e klimës dhe mjedisit dhe u larguan përsëri nga policia.

Barinjtë e drerave thonë se pamja dhe zhurma e makinerive gjigante të energjisë së erës i trembin kafshët e tyre dhe po ashtu prishin traditat e vjetra.

Presidentja e parlamentit Sami të Norvegjisë, një organ i zgjedhur konsultativ, do të takohet me ministrin e Energjisë dhe do të kërkojë falje përpara se të diskutojë një zgjidhje.

“Ne kemi nevojë që qeveria të pranojë qartë se ka shkelje të të drejtave të njeriut dhe pastaj të veprojë në përputhje me rrethanat dhe ta nderojë çështjen me seriozitetin që meriton”, ka thënë Silje Karine Mutoka.

Referuar Ministrisë së Energjisë, turbinat paraqesin një telash ligjor pavarësisht vendimit të Gjykatës Supreme dhe shpreson të gjejë një kompromis, por se mund të duhet edhe një vit për të marrë një vendim të ri.

Aktivistët kanë treguar se kishin mbledhur rreth 100 mijë dollarë ditët e fundit për të ndihmuar demonstruesit individualë të paguanin gjobat e policisë.

Marrë nga “Reuters”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.