Flet Babai i Burim Rrecit: Është në Mal të Zi në karantinë 10 ditë, akoma nuk dimë asgjë

Ish seketari i Ministrisë së Tregtisë dhe Industrisë në Kosovë, Burim Rreci, para katër dite u arrestua nga Policia e Malit të Zi, pasi që në veturën e tij u gjetën 50 kilogramë drogë të tipit marihuanë.

Menjëherë pas arrestimit të tij dhe publikimit të lajmit, familjarët e Burimit janë interesuar të dinë për të dhe rastin me të cilin ngarkohet.

“Ende është në Mal të Zi”, ka deklaruar babai i Burimit, Zekë Rreci, përmes telefonit, për Albanian Post.

Rreci i ka thënë mediumit se ka disa ditë që ai është duke provuar të takohet me të birin por e kishte të pamundur.

“Unë jam atje (Mal i Zi) qe 3 ditë, po s’kam mundur të kontaktoj me të”, ka rrëfyer ai.

Kjo, për shkak të masave anti COVID të cilat i ka caktuar shteti malazez.

“Nja 10 ditë është në karantinë, s’kemi pas të drejtë as me vizitu as me taku. Tash tu u kthy jam, nga atje. Nja 10 ditë është në karantinë për shkak të virusit”, ka vazhduar më tej Rreci.

Babai i Burimit tha se nuk dinë asgjë rreth rastit dhe nuk kanë mundur të marrin asnjë informatë.

“Kurgjo nuk po na thonë njëherë deri t’a kalon ai karantinën. Na nuk dimë asgjë rreth rastit, s’kemi pas mundësi me kontaktu me te e as me askë tjetër”.

Krejt çka di Zekë Rreci është se Burimit i kanë angazhuar një avokat në Mal të zi dhe procesi ndaj tij “fillon pas karantinimit”.

Duke mos qenë në gjendje të flas më shumë, Rreci tregoi se po vazhdon rrugën për  në shtëpi.

Më 15 shkurt, në pikën kufitare Debeli Brijeg, Policia malazeze ka arrestuar ish-sekretarin e Ministrisë së Tregtisë dhe Industrisë së Kosovës, Burim Rreci, pasi që në veturën e tij janë gjetur rreth 50 kilogramë marihuanë, ka raportuar mediumi malazez “Vijesti”.

Rreci është arrestuar herët në mëngjes, në terminalin e daljes.

Gjatë ditës nga Drejtoria e Policisë dhe Drejtoria e të Hyrave dhe Doganave kanë njoftuar zyrtarisht se zyrtarët e tyre gjatë kontrollit të një veture të pasagjerëve Audi me targa të Kosovës, të drejtuar nga ai shtetas i Kosovës, kanë gjetur shtatë pako me marihuanë.

“Aktivitetet e koordinuara të Drejtorisë së Policisë dhe Drejtorisë së të Hyrave dhe Doganave të mëngjesit të sotëm rreth orës 03:30 parandaluan kontrabandën e lëndës bimore e dyshuar si lëndë narkotike marihuanë me peshë rreth 48.2 kilogramë”.

“BR është privuar nga liria nën dyshimin se ka kryer veprën penale të paautorizuar. Prodhimi, posedimi dhe shpërndarja e lëndëve narkotike. Masat dhe veprimet e mëtejshme policore-prokuroriale për këtë rast janë në vazhdim e sipër”, thuhet në njoftim.

Ish-ministri i Tregtisë dhe Industrisë, Vesel Krasniqi, me 9 shtator të 2020-ës kishte marr vendim për pezullim nga puna të Sekretarit të Përgjithshëm të kësaj ministrie, Burim Rreci.

Arsye për pezullimin e tij nga kjo pozitë, sipas Krasniqit, është “neglizhenca” dhe “mosbashkëpunimi” nga ana e Rrecit.

“Bazuar në Legjislacionin në fuqi, si dhe për shkak të neglizhencës dhe mosbashkëpunimit nga ana e z. Burim Rreci, u vendos si në diapozitivin e këtij vendimi. Kjo masë është masë parandaluese dhe nuk prejudikon rezultatin final të vendimit”, thuhej në arsyetimin e këtij vendimi të nënshkruar nga ish-ministri Krasniqi.

Rreci ka pasur disa hyrje-dalje në këtë funksion. Ai u emërua në pozitën e Sekretarit të Përgjithshëm të MTI-së në vitin 2018, derisa në qeveri ishte Ramush Haradinaj. Ky emërim ishte kundërshtuar nga disa organizata të shoqërisë civile, por edhe nga Ambasada Britanike, pasi i njëjti vinte nuk i kishte plotësuar kushtet për këtë pozitë.

Në ndërkohë, Rreci ishte suspenduar nga MTI-ja edhe me 29 gusht të vitit 2018 nga ministri i atëhershëm i MTI-së, Bajram Hasani, me 29 gusht 2018. Një javë pas këtij vendimi, kryeministri i atëhershëm Haradinaj e kishte liruar Hasanin nga detyra me arsyetimin se një gjë të tillë e ka kërkuar Nisma.

Një javë pas shkarkimit të ministrit Hasanit, Rreci ishte rikthyer në pozitën që kishte më parë.

Në arsyetim të vendimit për rikthim në punë të Rrecit, thuhej se ka pasur shkelje materiale dhe procedurale në vendimin për pezullim.

Ndërkaq, më 11 nëntor të vitit 2019, Burim Rraci sërish bëhet lajm, pas një incidenti që kishte ndodhur në ministrinë ku ai ishte i angazhuar. Sipas informatave, Rreci ishte sulmuar në zyrën e tij fizikisht nga Arian Krasniqi, djali i vëllait të Jakup Krasniqit, ish-kryetar i Kuvendit dhe Kryetar i Këshillit Kombëtar të Nismës Socialdemokrate.

Pas këtij incidenti, Krasniqi ishte suspenduar nga puna.

Ndërkaq, Rraci kishte qëndruar në pozitën e Sekretarit të MTI-së deri në shkurtin e 2020-ës, kur Qeveria “Kurti” e kishte vënë atë në listë rezervë, bashkë me disa sekretarë tjerë.

Mirëpo, ky vendim i qeverisë “Kurti” u anulua me ardhjen e qeverisë “Hoti”. Në muajin qershor, në mbledhjen e rregullt të qeverisë së Kosovës, me propozim të ministrit të MTI-së, Vesel Krasniqi, u kërkua rikthimi në detyrë i Rrecit.

“Sekretari i përgjithshëm i Ministrisë së Tregtisë dhe Industrisë i caktuar me vendimin e qeverisë numër 1/26 të datës 29.01.2018, duhet të kthehet dhe të vazhdojë punën brenda mandatit ligjor brenda Ministrisë së Tregtisë dhe Industrisë”, kishte thënë ministri i MTI-së, Vesel Krasniqi më 22 qershor të atij viti.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.