Dy zyrtarë demokratë mes 11 të arrestuarve në protestën kundër ndalimit të abortit në Florida

Kryetarja e Partisë Demokratike të Florida-s dhe një ligjvënëse e shtetit demokrat u akuzuan për shkelje të ligjit pasi refuzuan të largoheshin nga një protestë në kryeqytetin e shtetit, Tallahassee, kundër një projektligji për të ndaluar abortet pas gjashtë javësh.

Kryetarja Nikki Fried dhe udhëheqësja e pakicës në senatin shtetëror, Lauren Book, ishin në mesin e një grupi të vogël protestuesish të arrestuar të hënën pranë ndërtesës së Capitol-it dhe të akuzuar për shkelje të ligjit.

Demonstrata erdhi disa orë pasi senati i Florida-s i kontrolluar nga republikanët miratoi një propozim për të ndaluar abortet pas gjashtë javësh.

Aktualisht vendi ndalon abortet pas 15 javësh.

Projektligji, i cili ka mbështetjen e guvernatorit republikan, Ron DeSantis, pritet të bëhet ligj.

Një ndalim gjashtë-javor do të përafronte Florida-n me kufizimet e abortit në shtetet e tjera të kontrolluara nga republikanët dhe do t’i jepte DeSantis një fitore politike për një çështje të rëndësishme me votuesit kryesorë republikanë përpara kandidimit të tij të pritshëm për nominimin presidencial vitin e ardhshëm.

Të hënën mbrëma, videot në mediat sociale treguan njerëzit duke brohoritur “turp” teksa oficerët i largonin protestuesit me pranga.

Departamenti i policisë së Tallahassee ka bërë me dije se protestuesve u ishte thënë se do të duhej të largoheshin pas perëndimit të diellit, por 11 persona refuzuan të shkonin dhe u arrestuan për shkelje.

“Ne protestojmë për të nderuar sakrificën e të gjitha grave që ishin para nesh dhe të gjitha grave që vijnë pas nesh. Të drejtat e grave janë të drejta të njeriut. Dhe të drejtat e njeriut duhet të jenë të patjetërsueshme”, ka thënë Fried.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.