Drejtësia amerikane i kthen Italisë 42 vepra arkeologjike

Drejtësia e New York-ut i ktheu Italisë të martën e 8 gushtit, 42 vepra arkeologjike të grabitura dhe shitura kontrabandë, me vlerë 3.5 milionë dollarë, duke e kthyer megalopolin amerikan në qendër të trafikut ndërkombëtar të antikave.

Lajmi u bë i ditur nga agjencia franceze “AFP”.

Këto pjesë të jashtëzakonshme – rreth 2 mijë e 500 vjet të vjetra – u kthyen, gjatë një ceremonie, tek autoritetet italiane nga hetuesit amerikanë, sipas një njoftimi për shtyp nga Prokurori i Shtetit të New York-ut për Borough of Manhattan, Alvin Bragg.

“Ne vazhdojmë të riparojmë dëmet e shkaktuara nga rrjetet e organizuara shumë mirë prej dekadash të kontrabandës së antikiteteve nëpër Itali”, përshëndeti Alvin Bragg, duke specifikuar se “më shumë se 200 vepra janë kthyer” në Romë që kur ai mori detyrën e kreut të prokurorisë së Manhatanit në vitin 2022.

Komandanti i Karabinierëve Vincenzo Molinese përshëndeti “suksesin e madh të hetimit falë një bashkëpunimi italo-amerikan”.

Ndër veprat e gjetura dhe të kthyera është një vazo nga rajoni italian i Puglia-s që daton në vitin 335 para Krishtit.

Ajo ishte vjedhur nga një vend varrimi në Italinë jugore përpara se të kontrabandohej jashtë vendit nga një trafikant i artit italian, Giacomo Medici, sipas drejtësisë së New York-ut.

Kjo kupë, e cila përdorej për përzierjen e ujit dhe verës, ishte gjetur nga një “tregtar i turpëruar britanik i artit, Robin Symes, i cili më pas e kishte pastruar atë nëpërmjet (kompanisë së ankandit) Sotheby’s në Londër”.

Vepra u sekuestrua në korrik nga një koleksionist privat në New York.

Dy piktura me pllaka të epokës etruske nga viti 440 para Krishtit u grabitën në Italinë qendrore në vitet 1980 përpara se të përfundonin te Robin Symes, i cili i shiti ato në 1992 për 1.6 milionë dollarë tek një çift koleksionistësh në New York, Shelby White dhe Leon Levy.

Të shqetësuar për origjinën e veprave, White dhe Levy i kthyen ato në vitin 1999 te Symes, i cili i mbajti në New York deri në marsin e kaluar.

Nën kujdesin e prokurorit Bragg, më shumë se 1 mijë pjesë për 185 milionë dollarë u kthyen në 19 vende, përfshirë Kamboxhia, Kinë, Indi, Pakistan, Egjipt, Irak, Greqi, Turqi apo Itali.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.