Disa fakte befasuese rreth ikonës së të drejtave civile, Martin Luther King

Për ekspertët, lufta e Martin Luther King Jr kundër varfërisë dhe pabarazisë është ende po aq e rëndësishme sa ishte gjatë lëvizjes amerikane për të drejtat civile.

Media britanike “BBC” ka renditur disa fakte pak të njohura për jetën dhe trashëgiminë e tij:

Fjalimi “Unë kam një ëndërr” ishte i improvizuar

Në gjysmë të fjalimit të tij në vitin 1963, këngëtarja e ungjillit Mahalia Jackson bërtiti duke i thënë atij “thuaju atyre për ëndrrën”.

Thirrja e shtyu atë t’i drejtohej një predikimi të mëparshëm që ai kishte mbajtur, ku ai përshkroi një version të ëndrrës amerikane që ishte i barabartë dhe i arritshëm për të gjithë qytetarët.

“Unë kam një ëndërr që katër fëmijët e mi të vegjël një ditë do të jetojnë në një komb ku nuk do të gjykohen nga ngjyra e lëkurës së tyre, por nga karakteri i tyre. Unë kam një ëndërr sot”, tha King.

Ky moment do të bëhej më vonë i njohur si fjalimi “Unë kam një ëndërr”. Dhe ka ende punë për të bërë për të përmbushur me të vërtetë ëndrrën e King për barazi, sipas Lerone Martin.

Për të, ëndrra e tij për barazinë është kryesisht amerikane.

“Pavarësisht gjithë përçmimeve që duroi, King bëri një punë të mrekullueshme duke u përpjekur vazhdimisht të tregonte se si përpjekjet e tij ishin në përputhje me idealet amerikane”, thotë ajo.

Emri i tij i lindjes ishte Michael King

Kur lindi më 15 janar 1929, ai mori emrin e babait të tij, Michael King.

Por gjashtë vjet më vonë, babai i tij vizitoi Gjermaninë dhe mësoi për Martin Luter-in, udhëheqësin e reformimit protestant.

Thuhej se ai ishte aq i frymëzuar sa u kthye në shtëpi dhe ndryshoi zyrtarisht emrin e tij dhe të djalit të tij të madh në Martin Luther King.

Vendosi të bëhej predikues në kolegj

Në vitin 1944, ai u pranua në Kolegjin Morehouse në moshën 15-vjeçare. Brezat e familjes King ishin diplomuar nga kolegji prestigjioz në Atlanta, Georgia.

Sipas Institutit King, udhëheqësi i ardhshëm i të drejtave civile thuhej se kishte qenë një student “i zakonshëm”, por koha e tij në Morehouse ishte e rëndësishme në zgjimin e pasionit të tij për barazinë sociale dhe e frymëzoi atë të bëhej predikues.

U arrestua më shumë se 25 herë

Në 13 vitet e tij si udhëheqës i të drejtave civile, King u arrestua 30 herë, kryesisht për kundërvajtje dhe shkelje të protestave civile, sipas Qendrës King.

Edhe pse ishte shpesh një objektiv i zbatimit të ligjit, atij nuk i pëlqente burgosja.

U arrestua në tetor 1960 pas një proteste në një dyqan në Atlanta dhe u mbajt në burgun shtetëror të Xhorxhias.

Ai i shkroi nga burgu gruas së tij, Coretta-s, duke thënë se shpresonte që “vuajtjet e tepërta që po i vijnë tani familjes sonë do të shërbenin në një farë mënyre për ta bërë Atlanta-n një qytet më të mirë, Georgia-n një shtet më të mirë dhe Amerikën një vend më të mirë”.

Shkroi pesë libra

Sipas Qendrës King, ai shkroi pesë libra gjatë jetës së tij dhe botoi koleksione të shumta të letrave dhe predikimeve të tij.

Libri i tij i vitit 1964, “Pse nuk mund të presim”, rrëfente ngjarjet që çuan në fushatën historike të Birmingham-it, Alabama, për t’i dhënë fund përçarjes.

Nëna e tij, Alberta, u vra gjithashtu

Më 30 qershor 1974, gjashtë vjet pas vrasjes së King-ut, një burrë 23-vjeçar qëlloi dhe vrau nënën e tij, Alberta Williams King, teksa po luante organo gjatë një shërbimi në Kishën Baptiste Ebenezer.

Sulmuesi u shpall fajtor dhe u dënua me vdekje, por më vonë u ridënua me burgim të përjetshëm pjesërisht për shkak të kundërshtimit të familjes King ndaj dënimit me vdekje.

Familja King pagoi për lindjen e Julia Roberts

Në një intervistë me Gayle King që u bë virale së fundmi, aktorja Julia Roberts konfirmoi një fakt pak të njohur për ditën e lindjes.

“Familja King pagoi faturat e mia në spital”, tha ajo, duke shtuar se familjet Roberts dhe King u bënë të afërta sepse prindërit e saj mirëpritën fëmijët e King në shkollën e tyre të aktrimit në Atlanta.

Më vonë, kur Julia lindi dhe familja e saj nuk mund të përballonte faturat e spitalit, King dhe gruaja e tij Coretta, “na ndihmuan të dilnim nga situata”.

Ishte vetëm 39 vjeç kur u vra

King ishte vetëm 39 vjeç kur u vra më 4 prill 1968. Ai kaloi më pak se 13 vjet në sytë e publikut duke bërë fushatë për të drejtat civile dhe barazinë racore.

Por sipas Qendrës King, në atë kohë të shkurtër ai ishte në gjendje të sillte më shumë përparim drejt barazisë racore në SHBA sesa 350 vitet e mëparshme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.