Diplomacia italiane pret në Brindisi takimin rajonal për “Korridorin 8”

Zëvendës kryeministri dhe Ministri i Punëve të Jashtme në Itali, Antonio Tajani ndodhet në një mision në Brindizi për të marrë pjesë në takimin ministror të Italisë, Shqipërisë, Bullgarisë dhe Maqedonisë së Veriut.

Lajmi u bë i ditur nga diplomacia italiane, duke cituar njoftimin zyrtar për shtyp.

Kryediplomati do të kryesojë një takim kushtuar Korridorit 8, një infrastrukturë multimodale e përfshirë në Rrjetin Trans-Europian të Transportit (TEN-T) që do të lidhë detin Adriatik me Detin e Zi.

Takimi do të mbahet të enjten në Kështjellën Federiciano në Brindisi.

Pjesëmarrësit do të jenë Ministrat e Punëve të Jashtme të Shqipërisë, Bullgarisë dhe Maqedonisë së Veriut.

Përveç një sesioni kushtuar posaçërisht Korridorit 8, axhenda e punimeve do të përfshijë një diskutim me fokus konfliktin në Ukrainë, Ballkanin Perëndimor dhe çështjet e migracionit.

Në rendin e ditës është edhe një diskutim për nevojën për përfshirje më të madhe të komuniteteve lokale dhe brezit të ri, gjë që është vendimtare për rritjen e besimit të shoqërisë civile ballkanike në perspektivën e integrimit në Bashkimin Evropian të vendeve të rajonit.

Në fakt, është një perspektivë të cilës Italia i kushton shumë rëndësi dhe të cilën e mbështet me gjithë zemër, vëren MPJ-ja italiane.

“Së bashku me Shqipërinë, Bullgarinë dhe Maqedoninë e Veriut, ne duam të promovojmë bashkëpunim dhe integrim më intensiv përmes Korridorit 8. Ky takim do të shërbejë edhe për të nisur një platformë për dialog politik dhe bashkëpunim që do të jetë shembull për bashkëpunimin rajonal në Ballkan duke asociuar dy shtete anëtare të BE-së dhe dy vende kandidate”, komentoi zëvendës kryeministri italian. “Ballkani është një rajon me rëndësi strategjike për Italinë, në të cilin qeveria italiane ka investuar, duke e profilizuar veten si një lojtar kryesor”.

Në margjinat e takimit, pas një vizite të shkurtër në bordin e anijes San Giorgio të marinës italiane, Tajani dhe ministrat e tjerë të Punëve të Jashtme do të udhëtojnë në Qendrën e Shërbimit Global të OKB-së dhe Depon e Reagimit Humanitar.

Baza e OKB-së në Brindisi është një qendër ekselence, në të cilën Italia synon të vazhdojë të investojë, edhe në sajë të spin-off-it që krijon për ekonominë vendase.

Korridori 8: Xhaçka niset drejt Brindisit për takimin katërlateral

Korridori 8: Tajani, në Brindisi më 27 korrik për një samit me Shqipërinë, Bullgarinë dhe Maqedoninë e Veriut

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.