Çfarë thonë rusët për vdekjen e mundshme të Prigozhin?

Kreu i Wagner, i cili në qershor u përpoq të rrëzonte udhëheqjen ushtarake të Rusisë, është raportuar i vdekur pas rrëzimit të një avioni.

Të 10 personat në bord u raportua se janë vrarë.

Por Kremlini ende nuk e ka konfirmuar vdekjen e Yevgeny Prigozhin, pavarësisht se zyrtarët rusë thanë se ai ishte në listën e pasagjerëve.

Rebelimi jetëshkurtër i Prigozhin u pa si sfida më e madhe për autoritetin e presidentit rus Vladimir Putin që kur ai erdhi në pushtet.

Prej asaj kohe, pasiguria ka rrethuar fatin e Wagner dhe shefit të tij të diskutueshëm.

Njoftimi nga Ministria e Emergjencave të Rusisë, se një avion privat që udhëtonte midis Moskës dhe Shën Petersburgut ishte rrëzuar, ka ngritur dyshimin se kreu i Wagner dhe bashkëpunëtorët e tij mund të ishin vrarë qëllimisht.

Gjatë viteve, një numër kundërshtarësh të Putinit ose interesave të tij kanë vdekur në rrethana të paqarta ose janë afër vdekjes, duke përfshirë Alexey Navalny dhe Sergei Skripal.

Agjencia ruse e lajmeve RIA Novosti raportoi se bishti i avionit ishte gjetur 3.5 kilometra nga vendi i rrëzimit.

TASS, një tjetër media shtetërore ruse e lajmeve, raportoi se një ekip hetuesish të Komitetit Hetues Rus u dërguan në vendin e përplasjes dhe reaguesit e parë po punonin në vendngjarje.

Sakaq, shkaku i rrëzimit ende nuk është përcaktuar.

Pamjet video të qarkulluara në mediat sociale duket se tregojnë avionin në një rënie të lirë vertikale, duke lënë një gjurmë tymi.

Kanali Telegram i lidhur me Wagner-in pretendoi se avioni ishte rrëzuar nga sistemet e mbrojtjes ajrore të ushtrisë ruse, por ky informacion nuk mund të verifikohej.

Gazetari i pavarur Andrei Zakharov, duke cituar një burim të paidentifikuar, ka treguar se Prigozhin të mërkurën po kthehej në Rusi nga një udhëtim në Afrikë, ku mercenarët e Wagner kanë vepruar prej vitesh dhe ku Prigozhin u filmua së fundmi për një video rekrutimi.

Gazetarja ruse Ksenia Sobchak ka thënë në një postim në Telegram se incidenti ishte “një mesazh plotësisht i qartë për të gjitha elitat, për këdo që kishte ndonjë mendim subversiv për drejtimin e operacionit special ushtarak dhe mendime të tjera në përgjithësi”.

Njerëzit në zonë kanë raportuar ndërkaq se kanë dëgjuar një zhurmë të fortë përpara se të shihnin rënien e avionit.

Disa burime të paidentifikuara kanë thënë për mediat ruse se besonin se avioni ishte rrëzuar nga një ose më shumë raketa.

“Sipas linjës ajrore, pasagjerët e mëposhtëm ishin në bordin e avionit Embraer-135 (EBM-135BJ)…Prigozhin, Yevgeny”, sipas Rosaviatsiya.

Mes tyre u rendit edhe Dmitry Utkin, një figurë e errët që menaxhonte operacionet e Wagner dhe dyshohet se shërbeu në ushtrinë e inteligjencës ruse.

Rosaviatsiya ka bërë me dije se ngriti një komision të posaçëm për të hetuar rrëzimin e avionit, i cili i përkiste MNT-Aero.

Modeli i avionit ekzekutiv Embraer kishte regjistruar vetëm një aksident në më shumë se 20 vjet shërbim, dhe ky nuk lidhej me dështim mekanik.

Kanalet e Telegram-it të lidhura me Wagner postuan pamje që dyshohet se tregonin rrënojat e avionit që digjen në një fushë, ndërsa zyrtarët rusë të zbatimit të ligjit qëndronin roje në vendin e rrëzimit pranë fshatit Kuzhenkino në rajonin Tver.

Rebelimit të Prigozhin iu dha fund nga një marrëveshje e dukshme e Kremlinit që e pa atë të pranonte të zhvendosej në Bjellorusinë fqinje.

Por në praktikë, ai ishte shfaqur të lëvizte lirshëm brenda Rusisë pas marrëveshjes që thuhet se kishte garantuar sigurinë e tij personale.

Asnjë reagim nga Kremlini

Ndërkohë, nuk ka pasur asnjë koment zyrtar nga Kremlini apo Ministria e Mbrojtjes për fatin e Prigozhin.

Teksa lajmi u përhap, Presidenti Vladimir Putin po merrte pjesë në një ngjarje për të përkujtuar 80-vjetorin e fitores sovjetike në Betejën e Kurskut gjatë Luftës së Dytë Botërore.

Bill Browder, një biznesmen me vite përvojë në Rusi dhe një kritik i Kremlinit, ka thënë se shumë rusë kishin pyetur veten se si Prigozhin ishte në gjendje të ikte me një fyerje kaq të pacipë ndaj Kremlinit pa pasoja.

Përplasja ndodhi në të njëjtën ditë kur media ruse raportoi se gjenerali Sergei Surovikin, një ish-komandant i lartë në Ukrainë, i cili thuhet se ishte i lidhur me Prigozhin, u shkarkua nga posti i tij si komandant i forcave ajrore ruse.

Surovikin nuk është parë në publik që nga rebelimi kur ai regjistroi një adresë video duke u kërkuar forcave të Prigozhin të tërhiqen.

Tatiana Stanovaya, një anëtare e lartë në Qendrën Eurasia të Carnegie Rusisë, ka thënë në Telegram se “pavarësisht se çfarë e shkaktoi rrëzimin e avionit, të gjithë do ta shohin atë si një akt hakmarrjeje” nga Kremlini”.

Marrë nga “Al Jazeera”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.