![](https://albanianpost.com/wp-content/uploads/2023/02/888.jpg)
Të enjten e 16 shkurtit në Kosovë janë kthyer 6 pjestarët nga Shoqata e Kosovës për Kërkim Shpëtim, të cilët kanë qenë të angazhuar në ofrimin e ndihmës në Hatay në Turqi, në misionin për të shpëtuar jetë, pas tërmetit që la mijëra viktima.
Pjesëtaret në aeroport janë pritur nga familjarët dhe nga ambasadori i Turqisë në Kosovë, Sabri Tunç Angılı.
Më 9 shkurt, një ekip prej gjashtë anëtarësh të shoqatës së kërkim-shpëtimit të Kosovës, ishin nisur për në Turqi për të ndihmuar në zonat e tërmeteve.
Ministri i Mbrojtjes, Armend Mehaj, kishte bërë të ditur se kontingjenti i Forcës së Sigurisë së Kosovës është duke realizuar me sukses të lartë operacionin e kërkim-shpëtimit në Turqi, pas tërmetit shkatërrues të së hënës.
Mehaj përmes një shkrimi në rrjetin social ‘Facebook’, kishte thënë se rajoni ku po operojnë ushtarët e FSK-së është njëri ndër më të goditurit.
“Specialistët e kërkim-shpëtimit urban dhe ekipet e mjekësisë emergjente dhe ata K9, të zbarkuar para dy ditësh në Republikën e Turqisë, me përkushtim dhe profesionalizëm të lartë janë duke zhvilluar operacionet e kërkim -shpëtimit në koordinim me autoritetet turke dhe ekipet e shpëtimit nga vende të ndryshme të botës”.
Tërmeti që goditi Turqinë, kishte fuqi prej 7.8 shkallësh të Rihterit.
Epiqendra e tërmetit ishte rreth 26 kilometra nga qyteti Nurdagi dhe rreth 33 kilometra larg qytetit Gaziantep, tha Shërbimi Gjeologjik amerikan.
Njëri nga vendet që ka ofruar ndihmë për popullin e Turqisë është edhe Kosova.
Nga krerët institucionalë është thënë se Kosova ka gatishmëri që të ndihmojë.
Presidentja e Kosovës, Vjosa Osmani, shkroi në Twitter se ndihma do të ofrohet përmes dërgimit të trupave të Forcës së Sigurisë në Turqi, nga ana tjetër opozita ka kërkuar krijimin e një fondi emergjent për ofrimin e ndihmave të nevojshme humanitare.
Nga Turqia të hënën ishte thënë se afër 9 mijë persona po marrin pjesë në operacionet e shpëtimit.
Numri i të vdekurve në Turqi ishte 31 mijë e 643 të hënën. Zyrtarët kanë ulur frekuencën e përditësimeve të numrit të vdekjeve dhe tani lëshojnë përditësime më të mëdha një ose dy herë në ditë.
Numri i të vdekurve në rajonin veriperëndimor të kontrolluar nga rebelët ka arritur në 2 mijë e 166, sipas grupit të shpëtimit Helmetat e Bardha, ndërsa 1 mijë e 414 njerëz kanë vdekur në zonat e kontrolluara nga Qeveria, sipas Ministrisë siriane të Shëndetësisë në Damask.
Numri i përgjithshëm i të vdekurve në Siri është rreth 3 mijë e 580.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com