Prokuroria e Korçës ka larguar prokuroren Vasjana Postoli nga hetimi i çështjes për vrasjen e Egli Progës.

Kjo pas kërkesës së bërë nga familjarët e viktimës, të cilët kishin kërkuar zëvendësimin e Postolit për arsye që lidhen me trajtimin e çështjes.

Postoli në një vendim të mëparshëm kishte ndryshuar akuzën ndaj Denis Meçes – autorit të dyshuar – duke e cilësuar atë si “vrasje nga pakujdesia”.

Çështja do të kalojë në dorën e një prokurori tjetër, i cili do të marrë përsipër hetimet.

Ndërkaq vetëm një ditë më parë përfundoi ekspertiza mjeko-ligjore për vdekjen e Progës  – me rezultate larg atyre të shpallura fillimisht nga autoritetet.

Ekspertiza mjeko-ligjore ka konstatuar dëmtime në trupin e viktimës.

Dëmtimet mësohet se janë zbuluar në ballë, veshë, hundë, faqe dhe supin e majtë. Dhe se këto dëmtime rezultojnë se janë shkaktuar nga një mjet i fortë prerës.

Ndërkohë, shkak i vdekjes së Egli Progës rezulton të ketë qenë hemorragjia në tru.

Mësohet gjithashtu se në mostrën e gjakut të Egli Progës është zbuluar prani e alkoolit etilik.

Akt-ekspertimi sakaq, i është dërguar Prokurorisë së Korçës.

Dhuna e ushtruar ndaj Egli Progës bëri që ai të ndërrojë jetë. Dhe i pandehuri kryesor Denis Meçe ndodhet në burg, nën akuzën e vrasjes nga pakujdesia.

Vrasja e 42-vjeçarit ndërkaq shkaktoi përplasje institucionale mes Policisë dhe Prokurorisë.

Teksa Policia e referoi ngjarjen si vrasje me dashje, Prokurorja e Korçës e zbuti akuzën në “vrasje nga pakujdesia”.

Më 19 gusht u mbajt në Sheshin Skënderbej edhe protestë-marshimi në lidhje me ngjarjen e rëndë.

Dhjetëra qytetarë u mblodhën për të kërkuar drejtësi për vrasjen e tij.

Sipas protestuesve, me vrasjen e tij ra shteti. “Kur krimi vret, shteti hesht”, është thirrja e tyre.