Kosova

Osmani e Kurti ngushëllojnë popullin turk: Kosova e gatshme të çojë FSK-në për ndihmë


Vjosa Osmani

Kosova është e gatshme të ndihmojë në këto momente të vështira ka shkruar kryeministri i Kosovës, Albin Kurti, në llogarinë e tij në Twitter pas tërmetit të fuqishëm me magnitudë 7.8 të shkallës Rihter që la të vdekur 284 persona në Turqi dhe po kaq të tjerë në Siri.

“Në vazhdën e tërmetit shkatërrues të mëngjesit të sotëm, shpreh ngushëllimet e mia të përzemërta për popullin e Turqisë dhe Sirisë, për familjet e viktimave dhe për ata që mbetën papritmas pa shtëpi. Republika e Kosovës është e gatshme të ndihmojë në këtë moment të vështirë”, shkruan Kurti në Twitter.

Kurti vetëm një ditë para tërmetit të madh ishte në një vizitë punë në Stamboll, ku edhe u prit nga presidenti turk Recep Tayyip Erdogan.

Njëjtë si Kurti edhe presidentja Vjosa Osmani, ka shprehur gatishmërinë e Kosovës për të ndihmuar përmes dërgimit të trupave të Forcës së Sigurisë në Turqi.

Osmani shkroi në llogarinë e saj në Twitter se bashkëndjen me të prekurit derisa ka ngushëlluar për viktimat.

“Bashkëndjej me të gjithë të prekurit nga tërmeti shkatërrues në Turqi. Ngushëllimet më të mëdha për të gjitha jetët e humbura dhe iu dëshiroj rikuperim sa më të shpejt të prekurve”, shkroi ajo, derisa shtoi se në Kosovë ekziston “solidaritet i plotë për gjithë popullin turk”, dhe se “Kosova është gati të ofrojë mbështetjen e nevojshme përmes Forcës së Sigurisë së Kosovës”.

Tërmeti i fuqishëm që deri në këto momente ka lënë të vdekur mbi 500 persona epiqendrën e kishte mes Turqisë dhe Sirisë.

Dridhjet e para filluan në orët e mëngjesit të hershëm.

Me kërkimet në vazhdim, raportimet vendore tregojnë një numër prej të paktën 284 personash, të cilët kanë humbur jetën në Turqi.

Teksa, në Siri, bilanci është edhe më tragjik, me 237 të vdekur dhe 639 të plagosur deri tani.

Këto janë shifrat të vërtetuara edhe nga ministritë përkatëse të shëndetësisë deri më tani.

Tërmeti goditi në orën 04:17 me atë lokale, në një thellësi prej 17.9 kilometrash, pranë qytetit Gaziantep, por të prekur kanë qenë edhe 10 qytete të tjera, përfshi edhe Diyarbakir-in.

Shumë prej ndërtesave janë shembur dhe qindra ekipe kërkim-shpëtimi ndodhen në terren për të bërë të mundur evidentimin e çdo të mbijetuari, apo trupi që ka humbur jetën.

Në një deklaratë për media, ishte ministri i Brendshëm turk, Suleymon Soylu, ai i cili bëri një bilanc paraprak, duke përsëritur se qytetet e prekura nga ana turke ishin Gaziantep, Kahramanmaras, Hatay, Osmaniye, Adiyaman, Malatya, Sanliurfa, Adana, Diyarbakir dhe Kilis.

Erdogan jep mesazhin e parë pas tërmetit shkatërrues

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore