11 të dënuarit me vdekje në Iran në pritje të ekzekutimit

Mohsen Shekari ishte i pari.

Vijnë të paktën edhe 11 të tjerë pas tij.

Emrat e demonstruesve të dënuar me vdekje për protestat që e kanë tronditur Iranin që nga shtatori nuk kanë dalë nga drejtësia iraniane. Janë thjesht një numër, 11.

Hipoteza e Amnesty International është se të paktën 28 prej tyre ​​janë në rrezik. Ata mund të ekzekutohen.

Sipas OJQ-së Iran Rights Watch, e cila është me seli në Norvegji, emrat e tyre mbahen “qëllimisht të fshehtë nga autoritetet e Republikës Islamike”.

“Qëllimi është të reduktohet kontakti i tyre me familjet dhe të parandalohet aksesi i barabartë në mbrojtje”, ka vijuar OJQ-ja.

Gholam-Hossein Mohseni-Ejèi, shefi iranian i drejtësisë, ka njoftuar të hënën e 5 dhjetorit se “dënimet e vendosura për protestat” do të zbatohen së shpejti.

Dhe 23-vjeçari i varur dje ishte i pari.

Dyshohet se dënimet me vdekje u nënshkruan në dy procese të ndryshme, më 30 nëntor dhe 5 dhjetor. Kështu sipas OJQ-ve kryesore që monitorojnë situatën e të drejtave të njeriut atje, Hrana dhe Iran Rights Watch.

Kjo e fundit ka raportuar se tre nga të dënuarit janë të mitur, ata janë 17-vjeçarë të arrestuar në Karaj për vrasjen e një paraushtaraku basij Ruhollah Ajamian në një përleshje.

Ai vdiq në shërbim më 12 nëntor, kurse fëmijët u arrestuan më 14 nëntor dhe u dënuan me vdekje, një dënim i paligjshëm sipas ligjit ndërkombëtar dhe Konventës për të Drejtat e Fëmijëve, të cilin Irani e ka ratifikuar.

Nga gjashtë të dënuarit më 30 nëntor, përveç tre 17-vjeçarëve, vetëm dy emra janë të sigurt.

Mohammad Ghobadlu, i cili dyshohet se ka përplasur një makinë policie, duke vrarë një oficer policie dhe Sahand Nour Mohammadzadeh, i cili dyshohet se i ka vënë zjarrin një ndërtese publike.

Gjykata revolucionare e provincës së Alborz-it, më 5 dhjetor, dënoi pesë persona me vdekje.

Janë pesë nga 16 të akuzuarit për vrasjen e një polici më 3 nëntor, në rrugën midis Karaj dhe Qazvin, në veriperëndim të kryeqytetit.

Ata po demonstronin në një marshim për vrasjen e një bashkëqytetari, Hadis Najafi, kur forcat e sigurisë i sulmuan.

Një tjetër protestues, Majidreza Rahnavard, i arrestuar në Mashad, është dënuar për vrasjen e dy rojeve me thikë.

Sakaq, ekzekutimi i tij që ishte caktuar për në nëntor është shtyrë.

Amnesty International ka raportuar për rastin e tij.

“I arrestuar më 17 nëntor, vetëm 12 ditë përpara gjyqit. Media shtetërore transmetoi pamjet e marrjes në pyetje, në të cilat ai i mbylli sytë dhe bëri deklarata vetëinkriminuese”.

I pari

Të enjten, Irani njoftoi ekzekutimin e parë të një të dënuari me vdekje për trazirat e fundit antiqeveritare: Mohsen Shekari.

E gjitha vjen pas protestave të ashpra të zhvilluara dy muajt e fundit në Republikën Islamike, të nisura pas vdekjes së një vajze kurde 22-vjeçare, Mahsa Amini, e cila u dhunua barbarisht nga Policia e Moralit, për mosmbajtje të rregullt të hixhabit.

Në bazë të akuzës së ngritur, personi i dënuar me vdekje, kishte dhunuar një ligjvënës iranian dhe e kishte plagosur atë.

Një aktivist ka thënë se ai u dënua pas një “gjyqi pa ndonjë proces të rregullt”.

“Komuniteti ndërkombëtar duhet të reagojë menjëherë dhe fuqishëm ndaj këtij ekzekutimi”, ka thënë Mahmood Amiry-Moghaddam, drejtor i grupit me bazë në Norvegji, Iran Human Rights.

“Nëse ekzekutimi i Mohsen Shekarit nuk do të ketë pasoja të rënda për qeverinë, do të përballemi me ekzekutimin masiv të protestuesve”, ka shtuar ai.

Një Gjykate Revolucionare iu tha se Mohsen Shekari kishte bllokuar rrugën Sattar Khan të Teheranit më 25 shtator dhe kishte përdorur një hanxhar për të sulmuar një anëtar të Forcës së Rezistencës Basij, një forcë paraushtarake vullnetare e vendosur për të shtypur protestat.

Më 1 nëntor, gjykata e shpalli atë fajtor për luftime “me qëllim të vrasjes, shkaktimit të terrorit dhe prishjes së rendit dhe sigurisë së shoqërisë”.

Ai apeloi kundër vendimit, por ai u la në fuqi nga gjykata supreme më 20 nëntor.

Referuar Iran Human Rights, Shekari-t i ishte mohuar qasja tek avokati i tij gjatë gjithë fazës së marrjes në pyetje dhe procedurave ligjore.

Deri më tani, dhjetë persona të tjerë janë dënuar me vdekje nga Gjykatat Revolucionare në lidhje me protestat. Por identiteti i të pandehurve nuk është bërë i ditur.

Dënimet me vdekje duket se u krijuan për të “shtypur më tej kryengritjen popullore dhe të ngjallin frikë në publik”.

Gjykatat Revolucionare vepruan “nën ndikimin e forcave të sigurisë dhe inteligjencës për të vendosur dënime të ashpra pas gjyqeve jashtëzakonisht të padrejta të shënuara nga procese të përmbledhura dhe kryesisht sekrete”.

Protestat e udhëhequra nga gratë kundër krijimit klerik të Iranit u nxitën nga vdekja në paraburgim e Amini-t, e cila u arrestua nga më 13 shtator për dyshimin se mbante hixhabin në mënyrë të pahijshme.

Ato janë përhapur në 160 qytete në të 31 provincat dhe shihen si një nga sfidat më serioze për Republikën Islamike që nga revolucioni i vitit 1979.

Udhëheqësit e Iranit i kanë portretizuar protestat si “trazira” të nxitura nga armiqtë e jashtëm të vendit. Megjithatë, shumica dërrmuese e protestuesve kanë qenë të paarmatosur dhe paqësorë.

Të paktën 475 protestues janë vrarë nga forcat e sigurisë dhe 18 mijë e 240 të tjerë janë arrestuar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.