Yevgeni Prigozhin – kreu i Wagner – ka vdekur në një aksident me avion privat

Yevgeni Prigozhin ka mbetur i vdekur pas një aksidenti ajror me një avion privat në zonën Tver Oblast të Rusisë, sipas Agjencisë Federale Ruse për Transportin Ajror.

Lajmin e kanë publikuar edhe dy prej transmetuesve kryesorë në Rusi, gazetat Tass dhe Kommersant.

Sipas publikimit të gazetave ruse, 10 pasagjerë kanë qenë në radhët e viktimave dhe një prej tyre është pikërisht shefi i grupimit mercenar Wagner, Yevgeni Prigozhin.

“Ka nisur një hetim për rrëzimin e avionit Embraer, i cili ndodhi sonte në rajonin e Tverit. Sipas listës së pasagjerëve, midis tyre është emri dhe mbiemri i Yevgeny Prigozhin”, shkruhet në njoftim.

Sipas Ministrisë ruse të Emergjencave, në bordin e avionit të rrëzuar ndodheshin 10 persona, përfshirë tre anëtarë të ekuipazhit. Sipas informacioneve paraprake, të gjithë në bord u vranë.

Disa prej burimeve pranë vendit të ngjarjes ndërkaq, kanë raportuar edhe vdekjen e Dmitry Utkin, një prej zyrtarëve më të lartë të Wagnerit, i cili po ashtu mendohet se ndodhej në bordin e avionit privat.

Një prej kanaleve të Wagner në Telegram, i emërtuar “Grey Zone”, ka raportuar ngjarjen duke thënë se avioni u rrëzua nga mbrojtja ajrore në rajonin Tver, i cili ndodhet në veri të Moskës.

Ndërsa, menjëherë kanë nisur edhe spekulimet se pas kësaj ngjarjeje nuk mundet veçse të fshihet dora e presidentit rus, Vladimir Putin, i cili pa diskutim me Prigozhin e kishte një çështje të hapur atë post-rebelimit.

Prigozhin mori emër mbi të gjitha për një revoltë të zhvilluar më 24 qershor, në të cilën përmes grupimit të tij mercenar, ai u fut në Rusi dhe nisi një marshim drejt Moskës, ku kërkoi deri edhe rrëzimin nga pushteti të Vladimir Putin në një pikë.

‘Sallata ruse’ e një grushti shteti në tentativë – 24 orët e Prigozhin kundër regjimit

Por, rebelimi zgjati vetëm 24 orë, pasi në bisedime intensive me liderin bjellorus, Alexander Lukashenko, u arrit një marrëveshje për tërheqjen e Wagner nga Rusia dhe ekzilin e tyre në Bjellorusi, ku u angazhuan për dy muaj në trajnimin e forcave bjelloruse në kufi me Ukrainën.

Roli i Wagner në luftën e Ukrainës ka qenë i plotë, ku luftimet më intensive i ka zhvilluar në fshatin Bakhmut, për mbi gjashtë muaj kundër forcave ukrainase, duke arritur ta marrë territorin.

Kush është Yevgeny Prigozhin, lideri mercenar i akuzuar për organizimin e një grushti shteti?

Megjithatë, kjo me një kosto shumë të lartë, pasi gjysma e trupave të Wagner u vranë në fushëbetejë.

Kjo e çoi Prigozhin në një rebelim të avashtë, me replika të ashpra në distancë kundër ministrit rus të Mbrojtjes, Sergey Shoigu, të cilin e ka akuzuar disa herë se ka kërkuar t’i shfarosë dhe ushtarët e Wagner nga faqja e dheut.

Së fundmi, ai ishte shfaqur në një video në Afrikë, të cilën e publikoi në kanalet e Wagner në Telegram.

Prigozhin publikon videon e parë pas rebelimit – ndodhet në Afrikë

Wagner besohet se ka mijëra luftëtarë në kontinentin e zi, ku ka interesa biznesi fitimprurës.

Ushtarët e Prigozhin janë të ngulitur në vende duke përfshirë Malin dhe Republikën e Afrikës Qendrore (CAR) – ku grupet e të drejtave të njeriut dhe OKB-ja i akuzojnë ata për kryerjen e krimeve të luftës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.