Teatri Kombëtar në Beograd do të jetë nikoqir i javës së teatrit të Kosovës për herë të parë në histori

Lajmin e ka bërë të ditur Qendra Multimediale nga Prishtina, përmes një komunikate dërguar mediave.

“Qendra Multimedia nga Prishtina ka nënshkruar një Memorandum Bashkëpunimi me Teatrin Kombëtar në Beograd për organizimin e javës së teatrit të Kosovës në Beograd, që do të ndodhë në vjeshtë, rreth datës 29 nëntor 2024”, thuhet në komunikatë.

Siç ka njoftuar, Qendra Multimedia, memorandumi është nënshkruar, nga drejtori i Teatrit Kombëtar në Beograd, Svetislav Gonçic dhe nga drejtori i Qendrës Multimedia në Prishtinë, Jeton Neziraj.

Nga kjo qendër, e kanë vlerësuar këtë ngjarje si të “jashtëzakonshme” dhe “historike” e që sipas tyre shënon një avancim të raporteve kulturore mes Kosovës e Serbisë.

Më tej, ata treguan se arritja e këtij memorandumi nuk ka qenë proces i lehtë.

“Negociatat janë zhvilluar për rreth dy muaj rresht, në Prishtinë dhe në Beograd. Në këta dy muaj negociata, u janë dhënë përgjigje të gjitha pyetjeve administrative e politike, të cilat shpesh nuk kanë qenë edhe aq të lehta. Mes këtyre çështjeve problematike ka qenë edhe çështja e pagesave dhe transaksioneve bankare për artistët e përfshirë”, tregohet tutje.

Në njoftimin e tyre shprehet keqardhje për anulimin e festivalit “Mirëdita, dobar dan”, pas mbajtjes së tij për një dekadë.

“Pas shumë vitesh konflikti të pashpresë ndërmjet dy vendeve, e sidomos pas tensioneve të javës që lamë pas, me ç ‘rast Qeveria e Serbisë anuloi në Beograd festivalin “Mirëdita, Dobar dan!”, ku po prezantohej skena artistike e Kosovës, lajmi për organizimin e javës së Teatrit të Kosovës në Beograd përbën një sihariq dhe kapërcim revolucionar në një kohë kur shpresa për normalizim të raporteve duket se është shuar plotësisht”.

Ndërkaq, drejtori, Svetislav theksoi se “jam i vetëdijshëm për peshën kulturore e politike që ka një ndërmarrje e këtillë, por jam i gatshëm t’i bart mbi supe pasojat”.

“Nga Ministria e Kulturës në Beograd më thanë që shqiptarët nuk kanë teatër. Por ata e kanë gabim. Shfaqjet e tyre mund të mos jenë të cilësisë së lartë artistike, por kjo s’ka rëndësi. E rëndësishme është që ne po ua japim dorën e pajtimit, po ua ofrojmë skenën tonë që ata të prezantojnë vallet e tyre, traditën. E di që shqiptarët kanë folklor të mahnitshëm”, ka deklaruar Gonçic.

Tutje, drejtori i Qendrës Multimedia, Neziraj, tregoi se është i emocionuar për këtë arritje të cilën e konsideroi si historike.

“Për herë të parë në skenën e Teatrit Kombëtar në Beograd do të prezantohen shfaqje nga Kosova. Për tri ditë me radhë, Beogradi do të frymojë shqip. Kemi pasur shumë mosmarrëveshje dhe mospajtime, por të gjitha janë tejkaluar falë vullnetit tonë për kompromis. Ky është teatri, kjo është forca e teatrit”, ka shtuar Neziraj.

Nga qendra “Multimedia”, paralajmëruan se programi i plotë i shfaqjeve që do të prezantohen javët në vijim.

Programi do të përfshijë edhe një shfaqje me aktorë të rinj serb, me titullin “Banjska-dhimbja dhe krenaria jonë”, kjo shfaqje do të realizohet nga rrëfimet e dëshmitarëve, materialet arkivore, fotografitë dhe xhirimet nga droni.