Ministrja për Marrëdhëniet me Parlamentin, Elisa Spiropali është takuar të hënën e 11 shtatorit me të Ngarkuarin me punë të Ambasadës së SHBA-ve në Tiranë, David Wisner.
Lajmi u bë i ditur nga zyrtarja shqiptare, duke cituar njoftimin në median sociale “Facebook”.
Gjatë takimit, Spiropali shtoi se u rikonfirmua dhe u ripohua rëndësia strategjike e marrëdhënieve mes Republikës së Shqipërisë dhe Shteteve të Bashkuara të Amerikës.
Ajo e quajti madje “aleancë vlerash dhe qëllimesh të përbashkëta”, në interes të dy vendeve që i lidh historia dhe i bën bashkë edhe e ardhmja.
“Vlerësim dhe mirënjohje për bashkëpunimin e pakursyer në përpjekjen historike të Shqipërisë për të ndërtuar shtetin e së drejtës, për demokratizimin e vendit dhe institucioneve, reformave komplekse të ndërmarra, reformën në drejtësi, mbi të gjitha edhe luftën kundër korrupsionit, si mjetet dhe instrumentet e pandryshuara të së nesërmes më të mirë, si rrugë të vetme të evropianizimit të Shqipërisë”, vërejti më tej ministrja.
Spiropali solli në vëmendje edhe bashkëpunimin e shkëlqyer mes dy vendeve në fushën e mbrojtjes, konvergim në strategjinë dhe tejkalimin e sfidave në sigurinë rajonale dhe angazhimet e Shqipërisë në NATO.
Një mesazh ajo e kishte edhe për viktimat e 11 shtatorit dhe 3 mijë viktimat e tij të pafajshme.
“Homazh dhe kujtesë për 11 shtatorin tragjik dhe 3 mijë viktimat e tij të pafajshme, mes të cilëve edhe tre shqiptarë, si një stacion historik që dëshmon nevojën e domosdoshme për ndërtimin e një mjedisi më të sigurt për të gjithë”, shtoi zyrtarja shqiptare.
Ajo ndau edhe vlerësimin për kontributin e Shqipërisë në rolin e saj si e zgjedhur për herë të dytë si anëtar i përkohshëm në Këshillin e Sigurimit të Kombeve të Bashkuara, si bashkëpenëmbajtëse me SHBA për çështjen e pushtimit brutal të Ukrainës.
Në përmbyllje, Elisa Spiropali shprehu po ashtu mirënjohjen për mbështetjen e vazhdueshme të partnerëve tanë amerikanë për zhvillimin e kapaciteteve në një sërë sektorësh me rëndësi strategjike.
Kujtojmë që, Wisner është takuar më herët me presidentin e Republikës, Bajram Begaj, kryeministrin Edi Rama dhe ministrat e sigurisë së vendit (të Brendshëm dhe të Mbrojtjes) Taulant Balla dhe Niko Peleshi.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.comLajmet kryesore
-
REL: Kosova s’është në agjendën e Komitetit të Ministrave të KiE-së
-
Manja i përgjigjet Alibeajt: 8 të dënuar nga GJKKO-ja përfituan nga Amnistia, nuk janë simbol i korrupsionit
-
Trajnuesit ushtarakë perëndimorë mund të shkojnë në Ukrainë, thotë ministri i Lituanisë
-
Siljanovska Presidente e re e RMV-së, VMRO merr 58 deputetë, “Fronti Evropian” 19, LSDM 18, “VLEN 13