Spanja ka kaluar në çerekfinale të kampionatit evropian Euro 2024 duke mposhtur Gjeorgjinë në ndeshjen e katërt të 1/8 së finales.
La Roja fitoi me rezultat të thellë ndeshjen ndaj Gjeorgjisë, duke u konfirmuar si favorite për të fituar për herë të katërt Euro 2024.
Gjeorgjia kaloi e para në epërsi në minutën e 17-të të ndeshjes. Robin Le Normand shënoi autogol pas një kundërsulmi të gjeorgjianëve.
Megjithatë, rezultatin e barazoi Rodri. Ai shënoi nga distanca për 1:1 në minutën e 39-të të ndeshjes që u luajt në Koeln të Gjermanisë.
Golin e dytë për Spanjën e realizoi Fabian Ruiz. Ai e konkretizoi në gol asistimin e Lamine Yamal i cili paraprakisht rrezikoi portën.
Nico Williams realizoi supergol për 3:1 në minutën e 75-të të ndeshjes, kurse golin e katërt e shënoi Dani Olmoi në minutën e 83-të.
Ndryshe, në çerekfinale Spanja do ta ketë përballë Gjermaninë, kurse Gjeorgjia përmbyllë aventurën e parë në Euro 2024.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
