Rumania përgatitet të ndërmarrë veprime ligjore kundër bllokadës së Austrisë për Shengen

Nëse Austria kundërshton pranimin e Rumanisë në Zonën Shengen të BE-së në mbledhjen e Këshillit të Drejtësisë dhe Çështjeve të Brendshme (JAI), Rumania ka të drejtë të kundërshtojë vendimin në Gjykatën Evropiane të Drejtësisë.

Kështu ka deklaruar Kryeministri i Rumanisë, Marcel Ciolacu.

Ai po pret mbledhjen e Këshillit në dhjetor, kur çështja e pranimit të Rumanisë dhe Bullgarisë në Shengen do të sillet sërish në tryezë.

Dhe nëse Vjena përdor veton pa arsye, Ciolacu do ta apelojë vendimin.

“Ne duhet të presim për JAI në dhjetor. Nëse mbetemi në logjikën në të cilën Austria përdor të drejtën e vetos pa justifikim, rezervoj të drejtën të kundërshtoj vendimin e Austrisë në Gjykatën e Lartë”, ka thënë Ciolacu.

Ai e ka konsideruar të pajustifikuar pozicionin aktual të Austrisë, duke vënë në dukje se Rumania dhe Bullgaria i kanë plotësuar të gjitha kushtet teknike për më shumë se dhjetë vjet.

Po ashtu ai ka shprehur besimin se do të gjendet një mënyrë që Rumania dhe Bullgaria të mos mbahen më në qoshe, duke theksuar se kjo nuk është kërkesë e të dyja vendeve ballkanike, por thjesht e drejtë.

“Unë mbaj mendimin tim se është krejtësisht e gabuar të vihen interesat dhe politika e brendshme para interesave të një Evrope të tërë në një kohë kur solidariteti ka më shumë rëndësi”, ka shtuar Ciolacu.

Paçka plotësimit të të gjitha kërkesave të nevojshme, Austria vazhdon të qëndrojë kundër zgjerimit të mëtejshëm të zonës pa kufij, duke pretenduar se për sa kohë sistemi Shengen nuk funksionon, nuk ka kuptim të zgjerohet më tej.

Në fillim të këtij viti, Ministria e Brendshme e Austrisë ka bërë me dije se qëndrimi i Austrisë mbetet i njëjtë lidhur me këtë çështje.

Ndryshe nga Austria, kancelari gjerman Olaf Scholz ka shprehur edhe një herë mbështetjen e tij për anëtarësimin e të dyja vendeve në zonën e udhëtimit pa viza, duke e konsideruar zgjerimin një shqetësim të rëndësishëm për qeverinë federale.

Marrë nga “SchengenVisaInfo.com”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.