Të hënën e 27 dhjetorit në Shqipëri kanë filluar rekrutimet për ushtarë dhe detarë në Forcat e Armatosura.
Ka qenë ministri i Mbrojtjes, Niko Peleshi, që e ka njoftuar hapjen e këtij procesi në median sociale “Facebook”.
Ndërsa shkruan se “ofrohen kushte pagese dhe trajnimi si asnjëherë më parë”, Peleshi fton të gjithë të rinjtë e interesuar të shohin kriteret e pranimit.
Në njoftimin e tij, shkruhet se Ministria e Mbrojtjes e konsideron “thelbësore” për Forcat e Armatosura rekrutimin e ushtarëve me një profil “sa më të lartë”.
Pjesë e këtij procesi do të mund të bëhet çdo i ri nga mosha 18-27 vjeç, që nuk ka probleme me ligjin.
Gjithashtu duhet të ketë një figurë të pastër morale, që nuk është person i dyshuar, i padëshirueshëm, i evidentuar dhe implikuar nga organet e zbatimit të ligjit për veprimtari të kundërligjshme apo kriminale.
Në faqen zyrtare të Ministrisë së Mbrojtjes janë publikuar të gjitha kriteret që kërkohen për procesin e rekrutimit, ku përcaktohet edhe kalimi i tre testeve; ai fizik, intelektual dhe psikologjik që do të kryhet në faza të caktuara.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
