Omani dënon “sulmet e përsëritura izraelite në rajon”

Omani, vendi i parë arab që e bëri këtë, dënoi sulmin, që i atribuohet Izraelit, të kryer në provincën e Isfahanit, në Iranin qendror.

Ministria e Jashtme e Sulltanatit, e raportuar nga mediat satelitore arabe, “dënon dhe denoncon sulmet e përsëritura ushtarake të Izraelit në rajon”.

Ushtria izraelite goditi Iranin të premten e 19 prillit – sipas dy zyrtarëve izraelitë dhe tre iranianë që folën për prestigjiozen “New York Times” – në atë që duket se ishte përgjigja e parë ushtarake e Izraelit ndaj sulmit të Iranit.

Zyrtarët iranianë thanë se një sulm kishte goditur një bazë ajrore ushtarake pranë qytetit të Isfahanit, në Iranin qendror.

Shkalla e sulmit ishte e paqartë.

Zyrtarët iranianë thanë se sulmi u krye nga drone të vegjël, ndoshta të nisur nga brenda Iranit, dhe se sistemet e tij të radarit nuk kishin zbuluar avionë të paidentifikuar, që hynin në hapësirën ajrore iraniane.

Ata thanë se një grup i veçantë dronësh të vegjël u rrëzuan në rajonin e Tabrizit.

Agjencitë iraniane të lajmeve raportuan se shpërthime u dëgjuan pranë të dy qyteteve, duke shtuar se objektet bërthamore në Isfahan nuk ishin goditur.

Menjëherë pas kësaj, faqet e internetit të gjurmimit të fluturimeve treguan se avionët civilë kishin devijuar rrugët e tyre larg zonës dhe mediat iraniane të lajmeve raportuan se disa aeroporte ishin mbyllur.

Por brenda pak orësh, televizioni shtetëror i Iranit kishte transmetuar pamjet e rifillimit të jetës normale në Isfafan dhe agjencia e aviacionit të Iranit tha se po hiqte kufizimet e fluturimeve.

Ushtria izraelite nuk pranoi të komentojë.

Të gjithë zyrtarët folën në kushte anonimiteti sepse nuk ishin të autorizuar të diskutonin publikisht.

Zyrtarët nga administrata Biden thanë se Izraeli e kishte paralajmëruar Washingtonin më herët të enjten se një sulm do të vinte në 24 deri në 48 orët e ardhshme.

Një paralajmërim që u dha nga një seancë virtuale e Grupit Konsultativ Strategjik SHBA-Izrael që përfshinte këshilltarin e sigurisë kombëtare të SHBA-ve. Jake Sullivan dhe homologun e tij izraelit, Tzachi Hanegbi si dhe ministri izraelit për çështjet strategjike, Ron Dermer.

Sipas “CNN”, izraelitët i siguruan amerikanët se objektet bërthamore të Iranit nuk do të shënjestroheshin.

Shpërthimet erdhën më pak se një javë pasi Irani gjuajti më shumë se 300 raketa dhe drone në Izrael, sulmi i tij i parë i drejtpërdrejtë në vend, në përgjigje të një sulmi izraelit në një kompleks diplomatik iranian në Siri që vrau shtatë zyrtarë iranianë më 1 prill.

Për ditë të tëra, liderët izraelitë kanë kërcënuar se do t’i përgjigjen sulmeve të Iranit, të cilat e kthyen luftën në hije shumëvjeçare në një konfrontim të drejtpërdrejtë.

Shefi i ushtrisë iraniane, gjeneralmajor Abdolrahim Mousavi, tha të mërkurën se Irani do t’i përgjigjet çdo agresioni izraelit.

Presidenti Biden e ka këshilluar Izraelin të mos përgjigjet, mes frikës se një kundërsulm izraelit do të përshkallëzohej në një luftë të gjithanshme.

Për më shumë se gjashtë muaj, Izraeli ka luftuar në dy fronte të tjera – kundër Hamasit në Gaza dhe Hezbollahut në Liban. Të dy janë aleatë të Iranit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.