Molliqaj: Partia në pushtet është duke përdorur politikisht policinë

Partia Socialdemokrate në konferencë për media të premten ka denoncuar një rast të keqpërdorimit të policisë së Kosovës nga Lëvizja Vetëvendosje në një nga ndërmarrjet banesore publike.

Kreu i PSD-së, Dardan Molliqaj është shprehur se Policia e Kosovës për herë të parë ka shkelur të gjitha normat ligjore.

“Policia sa herë që vendos për një bastisje dhe kontroll ajo i ka dëshmitarët me vetët sepse pretendohet kur bëhet një bastisje aty do të gjenden prova krime. Policia zbarkon pa prezencën e mediave dhe sot që janë bërë katër ditë është i vetmi aksion policor i bastisjes në institucionet publike që nuk ka marrë njoftim, pra policia nuk ka njoftuar”, deklaroi Molliqaj.

Tutje ka sqaruar se në bastisjen që është bërë në Ndërmarrjen Publike Banesore, Policia e Kosovës i ka ndalë kamerat e sigurisë për afro 1 orë.

“Prej rreth tre orë që qëndron në ndërmarrjen banesore, njësitet policore për rreth 55 minuta i fikin kamerat e sigurisë në të njëjtën kohë në kundërshtim me dispozitat e kodit penal i lokalizojnë përfaqësuesit e ndërmarrjes publike dhe në dy katër të këtij objekti qëndrojnë pa kamera të sigurisë pa persona përgjegjës të ndërmarrjes që i obligon ligji dhe nenet përkatëse”.

Kreu i PSD-së, ka apeluar tek policia e Kosovës që të informojnë se në cilin vendim janë bazuar për të ndaluar kamerat e sigurisë në një ndërmarrje publike.

“Ne bëjmë thirrje sot publikisht që të deklarojnë cili është vendimi që ata i ka lejuar të i ndalin kamerat dhe i bëjmë thirrje me bo publik sepse kjo është shkelje shumë e rëndë është hera e parë që policia bën shkelje të tillë dhe kjo nuk është shkelje e rastësishme është intervenim publik”.

Akuza të ngjashme ndaj policisë së Kosovës nga Partia Socialdemokrate ka pasur edhe më herët.

Më 17 qershor, zyrtari i Partisë Socialdemokrate, Frashër Krasniqi, pas arrestimit të disa aktivistëve të kësaj partie kishte thënë se njëri nga policët që morri pjesë në arrestimin e tyre është militant i Lëvizjes Vetëvendosje.

Si dëshmi për këtë, Krasniqi në konferencë për media, kishte treguar disa nga postimet e policit në fjalë, i cili përmes rrjetit social ‘Facebook’ kishte shprehur simpatinë e tij për pushtetin.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.