Mjalti mund të jetë një trajtim më i mirë për kollën sesa ilaçet e tjera

Hulumtimi i Universitetit të Oksfordit tregon se mjalti zvogëlon shpeshtësinë dhe ashpërsinë e kollës në mënyrë më efektive dhe më të shpejtë sesa ilaçet tradicionale.

Pas rishikimit të rezultateve të 14 provave klinike mbi trajtimin e infeksioneve të traktit të sipërm respirator, një ekip kërkimor në Universitetin e Oksfordit arriti në përfundimin se mjalti është opsioni më i mirë për trajtimin e disa prej simptomave të këtij lloji të infeksionit.

Studiuesit vlerësuan efektivitetin e disa llojeve të ilaçeve kundër infeksioneve të traktit të sipërm respirator, nga ilaçet e zakonshme të ftohjes deri tek antibiotikët. Qëllimi ishte gjetja e trajtimit më efektiv për sëmundjet që prekin fytin, hundën dhe rrugët e sipërme të frymëmarrjes.

Një aspekt tjetër që motivoi studimin është shqetësimi i komunitetit mjekësor në lidhje me përshkrimin e tepërt të antibiotikëve. Studimet e fundit kanë treguar se përdorimi pa kriter i këtyre barnave mund të përshpejtojë procesin e rezistencës bakteriale ndaj antibiotikëve, duke krijuar super baktere që nuk mund të vriten lehtë.

Përveç kësaj, antibiotikët shpesh përshkruhen për sëmundje për të cilat ato nuk janë as efektive – të tilla si ato të shkaktuara nga viruset, jo bakteret.

Në këtë kërkim për alternativa për të trajtuar infeksionet e traktit të sipërm respirator, efektiviteti i mjaltit është spikatur në disa studime, siç tregohet nga artikulli i Oksfordit i botuar së fundmi në “BMJ Evidence-based Medicine”. Provat klinike të analizuara përfshinë 1 mijë e 761 pacientë.

Duke marrë parasysh këtë bazë të dhënash, studiuesit vunë re se mjalti ishte 36% më efektiv në uljen e frekuencës së kollës sesa mjetet e tjera të testuara. Përveç kësaj, ishte 44% më mirë në zvogëlimin e ashpërsisë së kollës. Mjalti madje uli kohëzgjatjen mesatare të infeksionit në dy ditë.

“Kur mjekët dëshirojnë të përshkruajnë për URTI, ne do të rekomandonim mjaltin si një alternativë ndaj antibiotikëve”, thanë autorët e artikullit.

“Mjalti është më efektiv dhe më pak i dëmshëm se alternativat e zakonshme të kujdesit dhe shmang shkaktimin e dëmit përmes rezistencës antimikrobike”.

Sipas studiuesve, efektiviteti i mjaltit është për shkak të pranisë së peroksidit të hidrogjenit, një përbërës i mirënjohur antibakterial që lidhet gjithashtu me trajtimin lokal të prerjeve dhe gërvishtjeve. Gjithashtu, trashësia e tij ndihmon në zvogëlimin e acarimit.

Mjalti është i përballueshëm dhe mund të konsumohet pas moshës 1 vjeçare. Duhet të shmanget para kësaj periudhe për shkak të rrezikut të botulizmit tek foshnjat dhe sepse përmban sheqer.

Studiuesit gjithashtu sugjerojnë që të bëhen më shumë eksperimente të kontrolluara me placebo për të vërtetuar efektivitetin e mjaltit kundër infeksioneve të traktit të sipërm respirator.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.