Mikroplastika gjendet edhe në placentat njerëzore, shkencëtarët të shqetësuar për ndikimet në shëndet

Mikroplastikat janë gjetur në çdo placentë njerëzore të testuar në një studim, duke i lënë studiuesit të shqetësuar për ndikimet e mundshme shëndetësore në zhvillimin e fetusit.

Shkencëtarët analizuan 62 mostra të indeve të placentës dhe zbuluan se plastika më e zakonshme e zbuluar ishte polietileni, i cili përdoret për të bërë qese plastike dhe shishe.

Një studim i dytë zbuloi mikroplastikë në të 17 arteriet njerëzore të testuara dhe sugjeroi se grimcat mund të lidhen me bllokimin e enëve të gjakut.

Mikroplastikat janë zbuluar gjithashtu kohët e fundit në gjakun e njeriut dhe qumështin e gjirit, gjë që tregon një kontaminim të gjerë të trupave të njerëzve.

Ndikimi në shëndet është ende i panjohur, por mikroplastika është treguar se shkakton dëme në qelizat njerëzore në laborator. Grimcat mund të vendosen në inde dhe të shkaktojnë inflamacion, siç bëjnë grimcat e ndotjes së ajrit, ose kimikatet në plastikë mund të shkaktojnë dëm.

Sasi të mëdha mbetjesh plastike hidhen në mjedis dhe mikroplastika ka ndotur të gjithë planetin, nga maja e malit Everest deri te oqeanet më të thella.

Njerëzit dihet se i konsumojnë grimcat e vogla nëpërmjet ushqimit dhe ujit, si dhe duke i thithur ato.

Matthew Campen, profesor në Universitetin e New Mexico, SHBA, i cili udhëhoqi studimin, ka thënë se “nëse po shohim efekte në placentë, atëherë e gjithë jeta e gjitarëve në këtë planet mund të ndikohet”.

Ai ka shtuar se përqendrimi në rritje i mikroplastikës në indet njerëzore mund të shpjegojë rritje të çuditshme në disa probleme shëndetësore.

Campen ka thënë po ashtu se është thellësisht i shqetësuar nga rritja e prodhimit global të plastikës, sepse kjo nënkuptonte se problemi i mikroplastikës në mjedis “po përkeqësohet”.

Hulumtimi, i botuar në revistën Toxicological Sciences, gjeti mikroplastikë në të gjitha mostrat e placentës të testuara, me përqendrime që varionin nga 6.5 në 790 mikrogramë për gram.

Mikroplastika u analizua duke përdorur kimikate dhe një centrifugë për t’i ndarë ato nga indet, më pas duke i ngrohur ato dhe duke analizuar nënshkrimin kimik karakteristik të secilës plastikë.

E njëjta teknikë u përdor nga shkencëtarët në Universitetin Mjekësor Capital në Pekin, Kinë, për të zbuluar mikroplastikë në mostrat e arterieve njerëzore.

Mikroplastika u zbulua për herë të parë në placentë në vitin 2020, në mostrat nga katër gra të shëndetshme që kishin shtatzëni dhe lindje normale në Itali.

Shkencëtarët kanë thënë se “mikroplastika mbart me vete substanca të cilat, duke vepruar si ndërprerëse endokrine, mund të shkaktojnë efekte afatgjata në shëndetin e njeriut”.

Përqendrimi i mikroplastikës në placentë ishte veçanërisht shqetësues, sipas Campen.

Indi rritet vetëm për tetë muaj, pasi fillon të formohet rreth një muaj pas shtatzënisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.