Mbretëria e Bashkuar mund të dërgojë avionë luftarakë në Ukrainë për kohë afatgjate

Kryeministri britanik, Rishi Sunak, i ka kërkuar shefit të tij të mbrojtjes që të shikojë nëse Britania e Madhe mund t’i sigurojë Ukrainës avionë luftarakë për një plan “afatgjatë”.

Duke folur gjatë një vizite të papritur në Mbretërinë e Bashkuar nga presidenti i Ukrainës, Volodymyr Zelensky të mërkurën, zëdhënësi zyrtar i kryeministrit tha se Sekretari i Mbrojtjes Ben Wallace tani po “shikon në mënyrë aktive nëse ne dërgojmë avionë” në Ukrainë.

Ai u tha gazetarëve se kryeministri ka ngarkuar sekretarin e mbrojtjes të hetojë se “çfarë avionësh mund të jemi në gjendje të japim – por të jemi të qartë kjo është një zgjidhje afatgjatë.”

Komentet erdhën vetëm disa orë pas një fjalimi të rrallë të Zelenskyt në të dy dhomat e parlamentit britanik, gjatë të cilit lideri ukrainas bëri një lutje të re që vendi i tij të pajiset me avionë luftarakë, ndërsa ai kërkon të zmbrapsë pushtimin e Rusisë.

Ndalesa tjetër e Zelenskyt do të jetë Franca, sipas një zyrtari në Paris.

Downing Street ka argumentuar më parë se nuk është “praktike” t’i sigurohet Ukrainës avionë shumë kompleksë, të cilët do të kërkojnë trajnim të gjerë për t’u përdorur.

Por, në të njëjtën kohë e bëri të qartë se do të vazhdojë të “dëgjojë me kujdes” kërkesat e Ukrainës për mbështetje.

Duke folur të mërkurën, zëdhënësi i Sunak theksoi se ende nuk është marrë asnjë vendim për sigurimin e avionëve dhe se Mbretëria e Bashkuar po merr një “qasje shumëvjeçare për mbështetjen tonë për Ukrainën”.

Zelensky iu drejtua më herët një audiencë deputetësh, kolegësh dhe gazetarësh në Westminster Hall, zemra mesjetare e parlamentit britanik, ndërsa Kievi përgatitet për një ofensivë të parashikuar ruse.

Ai zhvilloi bisedime me Sunak dhe me Mbretin Charles III.

Kryeministri britanik njoftoi se Mbretëria tani do të trajnojë pilotët për operimin e avionëve luftarakë të standardeve të NATO-s, si dhe marinsat.

Kjo do të shoqërohet me një zgjerim të trajnimit britanik për rekrutët ushtarakë ukrainas, nga 10 mijë në 20 mijë ushtarë këtë vit.

Zëdhënësi i Sunakut tha se vendi i tij shpreson të marrë pilotët e parë ukrainas për trajnim në pranverë dhe konfirmoi se iniciativa do të përfshinte trajnimin e tyre për të fluturuar me avionë britanikë.

Vetëm një pjesë e vogël e liderëve kanë bërë një fjalim të tillë në Westminster Hall gjatë 30 viteve të fundit, duke përfshirë Nelson Mandela, Barack Obama dhe, së fundmi, Mbreti Charles III.

Duke iu drejtuar ligjvënësve të mbledhur, Zelensky falënderoi Britaninë për ” dorën e shtrirë të ndihmës” kur bota nuk dinte ende se si t’i përgjigjej pushtimit të Rusisë dhe bëri një sërë thirrjesh të theksuara për ndihmë ajrore perëndimore.

Zelensky i dhuroi Kryetares së Dhomës së Përfaqësuesve, Lindsay Hoyle, përkrenaren e një prej pilotëve më të suksesshëm të Ukrainës.

Aty shkruhej: Ne kemi lirinë, na jepni krahë për ta mbrojtur atë.

Udhëheqësi ukrainas bëri nderime edhe për ish-kryeministrin e Mbretërisë së Bashkuar, Boris Johnson, i cili ishte i spikatur në audiencë.

“Boris, i bashkove të tjerët kur dukej absolutisht e pamundur”, tha ai.

Përpara se Sunak të merrte detyrën, Zelensky kishte krijuar një lidhje me Johnson, i cili ishte një nga mbështetësit më të zëshëm të Ukrainës si kryeministër dhe madje bëri një vizitë të papritur në Kiev pas largimit nga detyra.

Sunak është zotuar të ruajë mbështetjen e Mbretërisë së Bashkuar që nga marrja e detyrës në tetor, megjithëse Johnson i ka kërkuar Perëndimit të shkojë më tej në pranimin e kërkesave për avionë luftarakë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.