Sulmuesi i Shqipërisë, Rey Manaj, ka mbetur pa skuadër. Klubi anglez, Watford, ia ndërpreu kontratën futbollistit kuqezi, derisa njoftimin e bëri këtë të mërkurë.
“Sulmuesit, Rey Manaj, i është anuluar kontrata me Watford-in me pëlqim reciprok”, shkruan klubi anglez që militon në kategorinë e dytë të futbollit në Angli, Championship.
Manaj në këtë mënyrë del futbollist i lirë dhe tani mund të transferohet në ndonjë skuadër tjetër, pavarësisht që është mbyllur afati kalimtar dimëror.
Rey Manaj’s contract has been terminated by mutual consent. We wish Rey all the best for the future.
— Watford Football Club (@WatfordFC) February 8, 2023
25-vjeçari nga Lushnja, që në të kaluarën ka qenë pjesë e Inter-it apo edhe e Barcelonës B, tani i duhet të gjejë sa më shpejt një skuadër të re për të qëndruar në formë dhe për ta marrë ftesën nga Shqipëria për ndeshjet e muajit mars.
Kujtojmë që sulmuesi shqiptar u transferua tek Watford-i në korrikun e vitit 2022 dhe që atëherë ka regjistruar shtatë paraqitje, duke shënuar dhe një gol.
Ndërkohë që shumica e kohës së përshkuar në “Vicarage Road”, stadiumin e klubit që militon në Championship, u kushtëzua nga dëmtimet.
Manaj numëron 30 ndeshje me kombëtaren kuqezi, prej të cilave ka shënuar edhe gjashtë gola.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com