Japonia i rikthehet energjisë bërthamore më shumë se një dekadë pas katastrofës së Fukushima-s

Japonia po shqyrton ndërtimin e reaktorëve bërthamorë të gjeneratës së ardhshme dhe rifillimin e centraleve të papunë.

Lëvizja shënon një ndryshim të madh politikash, 11 vjet pasi shkrirja e trefishtë në termocentralin bërthamor Fukushima Daiichi tronditi varësinë e vendit nga energjia atomike.

Kryeministri Fumio Kishida ka treguar se ka drejtuar një panel qeveritar për të parë se si “reaktorët bërthamorë të gjeneratës së ardhshme të pajisur me mekanizma të rinj sigurie” mund të përdoren për të ndihmuar Japoninë të arrijë objektivin për neutralitetin e karbonit.

Një objektiv që mendohet të arrihet deri në vitin 2050.

Ndryshimi i drejtimit, i cili mund të përfshijë zgjatjen e jetëgjatësisë së reaktorëve ekzistues, ka nxjerrë në pah luftën e Japonisë për të siguruar një furnizim të qëndrueshëm me energji si rezultat i luftës në Ukrainë dhe kostove të larta të energjisë.

Qeveritë e njëpasnjëshme janë detyruar të ulin varësinë e Japonisë nga reaktorët bërthamorë që nga fatkeqësia e marsit 2011, kur një cunami i fuqishëm shkatërroi furnizimin me energji elektrike rezervë të Fukushima Daiichi.

Çka shkaktoi edhe shkrirjen e tre nga gjashtë reaktorët e saj.

Që atëherë, shumica e centraleve bërthamore të Japonisë kanë mbetur të papunë. Kurse qeveria ka deklaruar se nuk do të ndërtonte reaktorë të rinj ose nuk do të zëvendësonte reaktorët e vjetruar, nga frika e një reagimi publik.

Nëse realizohen, planet e Kishida-s do të shënonin një përmbysje dramatike të këtij qëndrimi.

“Për të kapërcyer një krizë të afërt të shkaktuar nga një krizë e furnizimit me energji elektrike, duhet të ndërmarrim hapat maksimalë për të mobilizuar të gjitha politikat e mundshme në vitet e ardhshme dhe për t’u përgatitur për çdo emergjencë”, ka thënë ai.

Sakaq, Kishida pranoi se qeveria do të duhej të fitonte mbështetjen e publikut, i cili u kthye kundër energjisë bërthamore.

Shtatë reaktorë janë aktualisht në funksion, me tre të tjerë jashtë linje për inspektime të rregullta sigurie.

Dhjetëra të tjerë ende po kalojnë një proces rilicensimi sipas standardeve më të rrepta të sigurisë të prezantuara pas katastrofës së vitit 2011.

Fatkeqësia e vitit 2011 dërgoi sasi të mëdha rrezatimi në atmosferë dhe detyroi dhjetëra mijëra njerëz të largoheshin nga shtëpitë e tyre. Disa zona pranë uzinës mbeten jashtë kufijve, ndërsa të tjerat janë rihapur vetëm kohët e fundit për banorët.

Marrë nga “The Guardian”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.