Ambasadorja e Bashkimit Evropian në Shqipëri, Christiane Hohmann, ka sqaruar përfundimisht se pse është anuluar një grant prej 28 milionë eurosh nga fondi i Investimeve për Ballkanin Perëndimor, lidhur me Portin e Durrësit, ku ka shpjeguar se gjithçka lidhet me ndryshimin e kushteve të investimit.
“Sa herë ka ndryshim të kushteve të investimeve, ndryshim të granteve të investimeve, kjo bën që ato të anulohen”, ka treguar diplomatja gjermane.
Teksa, ajo e theksoi se pavarësisht këtij fakti, kjo gjë nuk do të thotë se nuk do të ketë komunikim me Qeverinë për të kuptuar se si investimi mund të zhvillohet më tej e më pas të kryhet.
Anulimi i grantit
Granti i Fondit të Investimeve për Ballkanin Perëndimor për Portin e Durrësit është anuluar të enjten e 24 nëntorit 2022.
Kështu ka konfirmuar për Albanian Post zyra për media e Bashkimit Evropian në Tiranë, pasi lajmi u dha fillimisht nga “Radio Evropa e Lirë”.
Shkak për këtë vendim është bërë modifikimi i projektit.
“Si rezultat i modifikimit të projektit dhe ndryshimit të përdorimit të portit aktual, BE-ja ka anuluar grantin e mbetur të WBIF (Fondi i Investimeve për Ballkanin Perëndimor) për investimin për projektin e mëparshëm të portit”.
Zyrtarët e unionit shprehen se, janë “duke u konsultuar me përfaqësuesit e Qeverisë edhe për prioritetet e investimeve”.
Vlera e këtij granti ishte 28 milionë euro.
Projekti parashikonte rehabilitimin e kalatave 1 dhe 2 në Terminalin Perëndimor të Portit të Durrësit, ku përpunohen thuajse të gjitha mallrat që vijnë nga jashtë.
Ndërhyrja ishte e domosdoshme pasi njëra prej tyre është ndërtuar në vitet 1945-1951 dhe tjetra më 1972 dhe ndërhyrjet e vetme janë bërë më 1994.
Projekti i financuar edhe nga BE-ja, parashikonte zgjerimin e sipërfaqes së kalatave, si dhe rritjen e thellësisë së projektuar, në mënyrë që të ankorohen edhe anije më të mëdha.
Ndërkohë, marrëveshja e nënshkruar ndërmjet Qeverisë shqiptare dhe investitorit nga Dubai, Mohamed Alaabar, e shndërron portin aktual në port jahtesh.
Nuk është hera e parë që Bashkimi Evropian shpreh rezerva për projektin e qeverisë shqiptare për të transferuar portin e Durrësit në Porto Romano.
Ndërkohë, sot në Kuvendin e Shqipërisë merret vendim për hapjen e tenderit për ndërtimin e portit të ri tregtar.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com-
Mashtrime me vlerë 10 milionë euro – SPAK shkatërron bazën me 10 mijë raste mashtrimi në Tiranë
-
Meta paralajmëron të tjera dosje të nxehta nga SPAK, më të mëdha se “5D” e Bashkisë Tiranë
-
Ngrihet Kryesia Ekzekutive e Partisë së Lirisë
-
Shqipëria drejt prodhimit të dokumenteve digjitalë të identifikimit
Lajmet kryesore
-
Meta paralajmëron të tjera dosje të nxehta nga SPAK, më të mëdha se “5D” e Bashkisë Tiranë
-
Finalja e Superiores do të arbitrohet nga Anthony Taylor
-
Opozita sllovake shpreson se votimi evropian do ta frenojë kryeministrin populist
-
Mashtrime me vlerë 10 milionë euro – SPAK shkatërron bazën me 10 mijë raste mashtrimi në Tiranë