Haxhiu: Vettingu dhe Byroja për konfiskimin e pasurisë kalojnë testin e Komisionit të Venecias
Ministrja e Drejtësisë, Albulena Haxhiu, në një konferencë për media, një ditë pasi mori pjesë në seancën e Komisionit të Venecias, ku ishin votuar dy opinione ligjore për Kosovën, ka treguar se kjo e fundit ka dhënë dritën e gjelbër, propozimit të Qeverisë së Kosovës për vettingun në sistemin e drejtësisë.
“Që të dyja këto nisma janë mbështetur nga anëtarët e Komisionit të Venecias dhe tashmë kemi marrë dritën e gjelbër për të filluar me procesin e Vettingut, por po ashtu edhe për të formalizuar punën e byrosë shtetërore për konfiskimin e pasurisë së pajustifikueshme”, ka thënë Haxhiu.
Sipas Haxhiut Komisioni i Venecias ka rekomanduar fillimisht verifikimin e krerëve të institucioneve të drejtësisë, përmes një mekanizmi të jashtëm, e për të vazhduar më pas me vlerësimin e gjyqtarëve dhe prokurorëve.
Komisioni i Venecias, sipas saj, ka gjetur probleme të shumta në sistemin e drejtësisë, duke nisur nga mungesa e besimit, korrupsioni, stërzgjatja e gjykimeve, nepotizmi dhe deri te përzgjedhja e Kryeprokurorit të Shtetit.
“Problemet e shumta në sistemin e drejtësisë siç janë mungesa e besimit, korrupsioni, stërzgjatja e gjykimeve mungesa e efikasitetit disiplinor, nepotizmit dhe së fundmi edhe problemet e përzgjedhjes së kryeprokurorit, janë konstatuar gjithashtu edhe nga Komisioni i Venecias e cila justifikon Vettingun. Sipas tyre një reformim e tërësishme e sistemit të drejtësisë në Kosovë është përgjigja për problemet e theksuara”, ka shtuar ajo.
Haxhiu po ashtu ka lajmëruar se Komisioni i Venecias ka dhënë dritën e gjelbër edhe për formalizimin e punës për Byron Shtetërore për Konfiskimin e Pasurisë.
“Komisioni ka gjetur se korrupsioni është një problem serioz e sistematik, prandaj sipas Komisionit të Venecias konfiskimi civil mund të jetë i dobishëm, pra Komisioni i Venecias e njeh mekanizmin për konfiskimin e pasurisë me bazë civile dhe jep sugjerimin se si një mekanizëm e tillë duhet fuqizuar i cili do të ishte kompetent për verifikimin fillestar dhe më pas konfiskimin përfundimtar do ta bëjë gjykata”, ka shtuar ajo.
Lajmin se tashmë është hapur rruga për Vettingun dhe krijimin e Byrosë për Konfiskimin e Pasurisë, dha edhe kryeministri, Albin Kurti, i cili ishte i pranishëm në konferencë për media së bashku me Haxhiun.
Sipas tij dy këto reforma në sistemin gjyqësor sipas tij janë vlerësuar lart nga Komisioni i Venecias.
“Komisioni i Venecias na bind se reformat e propozuara janë adekuate dhe në pajtim me politikat e shteteve demokratike. Për byronë për konfiskimin e pasurisë së pajustifikueshme, Komisioni i Venecias jo vetëm që na ka treguar afinitet të plotë, por ka kërkuar edhe zgjerim të kompetencave të mekanizmit për verifikimin e pasurisë”, ka thënë Kurti.
Tutje, ai u shpreh se gjithçka që kërkohet nga qeveria, do t’i dërgohet Kuvendit në një afat rekord.
“Pasi që reforma më nuk mund të pres, e qytetari më nuk mund të durojë. Besimi i qytetarëve do të përkthehet në punë, kurse puna në një rezultat të pritur për më shumë se një dekadë”, u shpreh Kurti.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com