Erdogan: Presidenti i Izraelit do të vizitojë Turqinë muajin e ardhshëm

Presidenti turk Reccep Tayyip Erdogan, ka deklaruar se homologu i tij izraelit Isaac Herzog do të vizitojë Turqinë para mesit të shkurtit dhe do të hapet një faqe e re në marrëdhëniet e tyre të tensionuara dypalëshe.

Mediat izraelite raportojnë se nga zyra e Herzog-ut nuk kishte asnjë konfirmim.

Në një intervistë me transmetuesin “NTV”, Erdogan tha gjithashtu se vizita e tij në Emiratet e Bashkuara Arabe më 14 shkurt do të përfaqësojë një periudhë të re në lidhjet midis dy vendeve, pasi Ankaraja kërkon të shkrijë marrëdhëniet me shtetet e Gjirit.

Javën e kaluar, ministri i Jashtëm i Izraelit, Yair Lapid, zhvilloi një bisedë telefonike me homologun e tij turk, Mevlut Cavusoglu – i pari mes ministrave të Jashtëm turk dhe izraelit që nga viti 2008.

Gjatë dy viteve të fundit, Erdogan ka punuar për të forcuar marrëdhëniet turke me Izraelin. Megjithatë, Izraeli ka qenë i kujdesshëm ndaj personalitetit të paqëndrueshëm të Erdogan-it dhe mbështetjes së palëkundur për palestinezët.

“Ne jemi të kujdesshëm”, tha një diplomat i lartë izraelit.

Izraeli dyshon se Erdogan do të përdorë marrëdhëniet e përmirësuara për të ndihmuar ekonominë e Turqisë dhe për të forcuar ndikimin e tij rajonal.

Javën e kaluar, pasi SHBA-të vendosën të anulonin mbështetjen e tyre për tubacionin izraelito-grek “EastMed” për arsye ekonomike dhe mjedisore, Erdogan bëri thirrje për koordinim izraelito-turk për një tubacion gazi në Evropë.

Në korrik, qeveria izraelite miratoi projektin “EastMed” prej 6 miliardë eurosh, i cili do të krijonte një tubacion të ri gazi nga Izraeli dhe Qipro në Evropë, në mënyrë që të ulte varësinë nga karburanti rus.

Projekti fitoi tërheqje, pasi Turqia, konsumatori më i madh i gazit në rajon, vendosi të mos blejë gaz nga rivali i saj Qipro dhe Izraeli.

Që prej marrjes së detyrës së tij, presidenti Herzog ka pasur tri biseda telefonike me Erdogan.

Herën e parë, Erdogan i telefonoi për të uruar Herzog-un për zgjedhjen e tij. Herën e dytë, Herzog e thirri Erdogan-in si pjesë e përpjekjeve për lirimin e një çifti izraelit që u arrestua në Turqi.

Në fillim të këtij muaji, Erdogan i telefonoi për të ngushëlluar Herzog-un pas vdekjes së nënës së tij, Aura.

Marrëdhëniet diplomatike Turqi-Izrael

Lidhjet midis Turqisë dhe Izraelit kanë qenë shpesh të vështira dhe të dy vendet dëbuan përfaqësuesin diplomatik në vitin 2018.

Turqia, në atë kohë, urdhëroi ambasadorin e Izraelit të kthehej në Izrael.

Nga ana tjetër, Izraeli i tha konsullit turk në Jerusalem, i cili ishte përgjegjës për lidhjet e Turqisë me palestinezët, të kthehej në Turqi.

Një burim diplomatik i tha “Haaretz-it” se, megjithëse Erdogan ka sinjalizuar një dëshirë për të përmirësuar lidhjet me Izraelin disa herë në vitet e fundit, deklaratat e tij të prera mbi çështjen palestineze – disa nga ato të javës së kaluar – e bëjnë të vështirë për diplomatët të dallojnë qëllimet e tij.

Në vitin 2011, në përgjigje të një raporti të OKB-së që thoshte se Izraeli nuk shkelte ligjin ndërkombëtar kur mori me forcë kontrollin e një flote anijesh turke të lidhur me Gazën, Erdogan shkëputi lidhjet e Turqisë me Izraelin.

Turqia tërhoqi ambasadorin e saj në Tel Aviv dhe dëboi ambasadorin izraelit në Ankara.

Në vitin 2016, të dy vendet nënshkruan një marrëveshje pajtimi, e cila përfshinte pagesën nga Izraeli të 20 milionë dollarëve për një fondacion humanitar të përdorur për dëmshpërblime për familjet e shtetasve turq që vdiqën në bordin e flotës së anijeve.

Marrëveshja çoi në emërimin e një ambasadori izraelit në Ankara, i cili shërbeu për dy vjet para se të dëbohej sërish.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.