Çfarë përfshin projekti i Portit të ri të Durrësit?

Më 1 maj 2022, si për t’i paraprirë asaj çfarë do të ndodhte në fundvitin 2022 në Shqipëri, investitori i Emirateve, Muhamed Alabbar, do të jepte një intervistë për median amerikane CNN, mbi atë që do të kthehej në investimin më të madh për një port turistik në Detin në Mesdhe.

Një projekt ky, i cili më parë ishte lajmëruar vetëm nga kryeministri i Shqipërisë, Edi Rama, i cili më 17 prill, në kulmin e fushatës elektorale, do të jepte një premtim ndaj elektoratit: Porti i Durrësit, do të jetë Dubai i Mesdheut!

Nuk do të ngjante fort realiste në fakt asokohe kjo deklaratë nga kreu i Qeverisë, i cili kërkonte konfirmimin në detyrë për të tretën herë radhazi dhe të dytën si i vetëm, por sot, rruga drejt “Dubait të Mesdheut”, është e hapur.

Me votimin në Parlament orët e para të mëngjesit të 25 nëntorit, projekti i njohur si “Durrës Marina Bay”, duke marrë 74 vota pro, merr edhe dritën jeshile për nisjen e punimeve në vitin 2023.

Ai do të zhvillohet në një sipërfaqe trualli prej 812 mijë e 600 metrave katrorë.

Në të parashikohet të bëjnë pjesë 12 mijë apartamente dhe dy hotele me 850 dhoma në tërësi.

Projekti parashikon gjithashtu 80 mijë metra katrorë hapësira të gjelbra, ose hapësira të hapura, si edhe një gjatësi plazhi prej 700 metrash.

Ndërsa, Qeveria, është bërë me dije se do të marrë 33.3% të dividentit.

Por, çfarë fshihet përtej shifrave?

Vetë Alabbar, si më 1 maj 2021 kur foli për projektin për të parën herë, si më 31 dhjetor 2021, kur vizitoi zonën e përfshirë në projekt, por po ashtu edhe pas kalimit të projektit në Parlamentin shqiptar, e ka theksuar dhe ritheksuar një gjë të vetme: Nuk keni parë asgjë si ky projekt më parë, me një shndërrim të tillë!

Në mënyrë faktike, ai fillimisht përfshin edhe zhvillimin e zonës së Spitallës me procesin e rindërtimit të pas-tërmetit të 26 nëntorit 2019.

Kështu, përpos resortit në vetvete, do të mendohet edhe për banorët e zonës, ku një pjesë e madhe preken nga projekti. Kjo gjë, duke i dhënë vlerë të shtuar pasurisë së paluajtshme atje.

Një zhvillim “mbresëlënës” sipas Alabbar, është edhe fakti se në zonë do të investohen 2 miliardë euro dhe do ta kthejë këtë në investimin më të madh në Ballkan, të realizuar në periudhën kohore deri në vitin 2025, kur edhe mbaron mandati i tretë i Ramës në krye të vendit.

Porti tregtar

Me kthimin e portit aktual të Durrësit, i cili ka natyrë tregtare, në port turistik, lind domosdoshmëria për të zhvendosur infrastrukturën portuale të tanishme.

Kjo gjë, do të bëhet duke investuar në Porto Romano, ku është tërhequr tashmë vëmendje edhe nga shtetet e tjera.

Ky fakt, vjen pasi Kosova nga njëra anë dhe Maqedonia e Veriut nga ana tjetër, kanë shprehur interes të qartë për të pasur pikërisht këtë port, si porte të thatë në vendet e tyre.

Zhvillimi do të përfshijë edhe sistemin hekurudhor, i cili pritet fillimisht të lidhë aeroportin me Tiranën dhe Porto Romanon e më pas edhe me Prishtinën dhe Strugën, për ta quajtur projektin të përmbyllur.

E gjitha, bashkëngjitur me projekte si infrastrukturore si unaza shqiptare ballkanike, e cila do të lidhë Tiranën, Prishtinën dhe Shkupin përmes një autostrade.

Nën kontestime të shumta nga opozita shqiptare, me pretendimin se Qeveria është palë e korruptuar në këtë projekt, përfundimi me dritë jeshile, ishte i vështirë.

Po aq të vështira, siç ka thënë edhe kreu i Qeverisë, Rama, kanë qenë edhe negociatat mes shtetit dhe investitorit Alabbar.

Mirëpo, tashmë, gjithçka mbetet për t’u parë është konkretizimi, nëse Durrësi vërtetë do të kthehet në Dubain e Mesdheut, apo jo.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.