Bugajski: Moska po imiton Beogradin për të diskredituar Ukrainën dhe Kosovën

Janusz Bugajski, gazetar dhe njohës i dinamikave politike në Ballkanin Perëndimor, nëpërmjet një cicërime në llogarinë e tij në “Twitter”, ka reaguar në lidhje me pretendimet e Rusisë se Ukraina po merret me trafikimin e organeve të viktimave të luftës, madje me mbështetjen e botës perëndimore.

Zëdhënësja e Ministrisë së Punëve të Jashtme të Rusisë, Maria Zakharova, në një editorial të mbushur plot propagandë dhe të pavërteta, ka hedhur akuza në drejtim të Ukrainës se po merret me trafikimin e organeve – një pretendim identik me narrativën e Serbisë për ish-udhëheqësit e Ushtrisë Çlirimtare të Kosovës (UÇK).

“Moska po imiton sërish Beogradin – gjenocid, pushtim territorial dhe pretendime të rreme për “trafikimin e organeve” për të diskredituar Ukrainën dhe Kosovën”, ka shkruar Bugajski, duke iu referuar përpjekjeve serbe për diskreditimin e institucioneve dhe udhëheqësit e saj, posaçërisht ish-eprorët e UÇK-së.

E në një editorial të botuar të hënën në gazetën ruse që mbi të gjitha shërben për përhapjen e propagandës dhe dezinformatave nga Qeveria e Rusisë, zëdhënësja ruse shkruan se “Ukraina është e njohur si lidere botërore në trafikimin e organeve” për një kohë të gjatë, ndërse ka tentuar që këto pretendime t’i lidhë edhe me UÇK-në.

Ajo ka pretenduar se individë të UÇK-së mund të kenë lidhje apo janë marrë me trafikimin e organeve, ndërsa ka përmendur edhe gjyqin ndaj ish-presidentit të Kosovës, Hashim Thaçi dhe ish–drejtuesve tjerë të UÇK-së që ka nisur në muajin prill në Dhomat e Specializuara të Kosovës me seli në Hagë të Holandës.

“Ka informacione se individët e përfshirë në Ushtrinë Çlirimtare të Kosovës mund të kenë një dyqan organesh ose të paktën merren me trafikimin e organeve. Një nga udhëheqësit e saj tani është në gjyq për trafikim të organeve të ushtarëve të vdekur serbë, civilëve dhe disidentëve të tjerë gjatë luftës në Jugosllavi”, ka shkruar ajo.

Rusia ka kohë që është përqendruar në lojën e propagandës dhe dezinformatave, veçanërisht pas nisjes së pushtimit në shkallë të plotë të Ukrainës në shkurt të vitit 2022, nëpërmjet mediave tradicionale dhe ato sociale, për të ndryshuar narrativën në favor të saj, ashtu sikurse fushata dezinformuese e Serbisë kundër Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.