Kryeministri i Britanisë së Madhe Boris Johnson, ka emëruar të gjithë kabinetin qeveritar pas valës së dorëheqjeve të ministrave dhe zyrtarëve të tjerë.
Lajmin e ka bërë të ditur agjencia mediatike BBC.
Lëvizja vjen pasi Johnson do të japë dorëheqjen si lideri i Partisë Konservatore, por ai do të vazhdojë detyrën e kryeministrit deri në vjeshtë.
Një garë lidershipi për partinë do të zhvillohet këtë verë dhe kryeministri i ri do të zgjidhet në kohë për konferencën e Partisë Konservatore në tetor.
Kjo, pasi brenda 24 orëve kanë dhënë dorëheqjen mbi 40 anëtarë të qeverisë britanike.
Thuhet se ky është numri më i lartë i dorëheqjeve nga qeveria brenda 24 orëve në histori.
Edhe mbështetësit e mëparshëm besnikë – përfshirë Sekretaren e Brendshme të Mbretërisë së Bashkuar Priti Patel dhe Sekretarin e Transportit Grant Shapps – i kërkuan Johnson të largohej nga posti i kryeministrit.
Vala e dorëheqjeve vjen pas një sërë skandalesh nga kryeministri, duke përfshirë një raport zyrtar për keqmenaxhimin e pandemisë.
Raporti hetimor i nëpunëses së lartë civile, Sue Grey, e ka akuzuar Johnsonin për keqmenaxhim serioz: gjatë pandemisë.
Aty shkruhej se ai kishte festuar vazhdimisht në kundërshtim me rregullat e distancimit social dhe i kishte shpallur ato si mbledhje qeveritare.
Johnson ka premtuar se do të luftojë, por nëse humbet votën, ai do të mbetet pa punë dhe një garë për ta zëvendësuar do të fillojë.
Pretendentët për të udhëhequr Partinë Konservatore
Liz Truss
Liz Truss, sekretarja e Jashtme që u emërua nga Johnson vitin e kaluar, shihet si një “yll politik” në rritje.
Ajo mbajti poste edhe me ish-kryeministrat David Cameron dhe Theresa May, dhe bëri krahasime me Margaret Thatcher pasi postoi foto nga një udhëtim në Rusi vitin e kaluar.
Truss është sekretarja e parë grua e Jashtme për një Qeveri konservatore dhe përkrahja e saj për sanksione kundër oligarkëve rusë në fillimin e luftës në Ukrainë u brohorit nga publiku.
Por ajo shprehu gjithashtu mbështetje të fortë për Johnson pas largimit të dy prej ministrave të kabinetit të tij të martën, kështu që mbetet për t’u parë nëse kjo besnikëri mund ta dëmtojë atë politikisht.
Nadhim Zahawi
Nadhim Zahawi, i cili u emërua si kancelar i Thesarit disa orë pas dorëheqjes së Rishi Sunak, është ngritur në radhët e Partisë Konservatore gjatë dekadës së fundit dhe shihet si një pretendent i fortë për të udhëhequr partinë.
Ai ka qëndruar në krah të Johnson, por e bëri të qartë të mërkurën në mëngjes se fokusi i tij kryesor ishte shërbimi publik ndaj vendit.
Zahawi, 55 vjeç, ka qenë më parë sekretar i arsimit dhe ka shërbyer si ministër i vaksinave gjatë kulmit të pandemisë së Coronavirusit.
Ai lindi në Irak në vitin 1967 dhe emigroi në Britani me familjen e tij në vitet 1970 kur Sadam Huseini erdhi në pushtet.
55-vjeçari ka folur shpesh për mënyrën sesi Britania i ka dhënë atij dhe familjes së tij “gjithçka” dhe ai e ndjen për detyrë t’i shërbejë kombit.
Jeremy Hunt
Jeremy Hunt, ish-sekretari i Jashtëm të cilin Johnson e mposhti në garën e fundit të lidershipit të partisë, shihet gjithashtu si një lider i mundshëm partie.
Pasi humbi garën e lidershipit të vitit 2019, ai u zhvendos në shtyllat e pasme të partisë, por ka vazhduar të jetë një anëtar me ndikim.
Gjatë gjithë pandemisë, ai ka qenë një kritik i zëshëm i qasjes së Qeverisë ndaj Covid-19.
Hunt fillimisht e kundërshtoi Brexit-in në një referendum të rëndësishëm të 2016-ës, por në vitet që pasuan ka dalë në mbështetje të tij.
Gafat e tij publike e kanë “lënduar” atë në të kaluarën, duke përfshirë momentin, kur ai e përshkroi aksidentalisht gruan e tij kineze si japoneze.
Rishi Sunak
Rishi Sunak, ish-kancelari i Thesarit, dorëheqja e të cilit të martën i dha një goditje të rëndë Johnson, është parë prej kohësh si një lider i mundshëm partie, edhe pse reputacioni i tij është dëmtuar nga polemikat e fundit.
Ai u ‘prek’ politikisht në fillim të këtij viti kur u bë publike se gruaja e tij e pasur kishte shmangur pagimin e taksave duke pretenduar një status special dhe se ai vetë kishte vazhduar të mbante një green card të SHBA-ve, duke e lejuar atë të jetonte dhe të punonte në Shtetet e Bashkuara për muaj të tërë.
Ai u gjobit gjithashtu për shkeljen e rregullave të bllokimit të coronavirusit pasi mori pjesë shkurtimisht në një festë për ditëlindjen e Johnson në 10 Downing Street në 2020.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
