“Demokratët nuk i lidh asgjë me ‘Shtëpinë e Ilirit’”.
Kështu ka reaguar sekretari i përgjithshëm i Partisë Demokratike, Gazment Bardhi, fill pas vendimit të Komisionerit Shtetëror të Zgjedhjeve, Ilirjan Celibashi.
Ky i fundit regjistroi koalicionin e Lëvizjes Socialiste për Integrim dhe Partisë Demokristiane nën logon “Shtëpia e Lirisë”, duke lënë jashtë Komisionin e Rithemelimit të PD-së – fraksioni i Sali Berishës.
“Përtej çdo makinacioni dhe mashtrimi politik, më 6 mars ka vetëm një Parti Demokratike në zgjedhje. KQZ-ja sapo zyrtarizoi koalicionin ‘Shtëpia e Ilirit’, me parti përbërëse vetëm LSI e Monika Kryemadhit dhe PDK e Nard Ndokës”, shkruan Bardhi në median sociale Twitter.
Përtej çdo makinacioni dhe mashtrimi politik, në 6 Mars ka vetëm një Parti Demokratike në zgjedhje. KQZ sapo zyrtarizoi koalicionin “Shtëpia e Ilirit”, me parti përbërëse vetëm LSI e Monika Kryemadhit dhe PDK e Nard Ndokës. Demokratët nuk i lidh asgjë me “Shtëpinë e Ilirit”. pic.twitter.com/Fs5o1wIRhM
— Gazment Bardhi (@GazmentBardhi) February 4, 2022
Sipas Bardhit koha ku demokratët strehoheshin në “Shtëpinë e Ilirit, për interesa të rritjes së pazarit të tij me Edi Ramën ka përfunduar”.
“Koha që nëpërmjet rritjes së LSI-së me demokratë të dhënë borxh, t’i shërbehet pushtetit të Edi Ramës ka përfunduar’, vijon Bardhi.
Në përfundim ai shkruan se, “PD-ja është shtëpia e vetme e demokratëve”.
Celibashi nuk regjistroi Komisionin e Rithemelimit të Berishës, nën argumentimin se simbolet e PD-së, nuk mund të përdoren përveçse nga Partia Demokratike. Pra, Komisioni i Rithemelimit, de jure nuk do të jetë pjesë e zgjedhjeve, por de facto po.
Po ashtu, edhe në fletën e votimit apo fushatën zgjedhore, koalicioni nuk do të mund të përdorë simbole të PD-së. Sipas Komisionerit kjo pasi mund të ngatërrojë votuesit.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
