![](https://albanianpost.com/wp-content/uploads/2022/02/ipiccy_image4.jpg)
Komisioneri Shtetëror i Zgjedhjeve, Ilirjan Celibashi, ka shpallur zyrtarisht regjistrimin e koalicionit “Shtëpia e Lirisë”, midis Lëvizjes Socialiste për Integrim, Komisionit të Rithemelimit dhe Partisë Demokristiane.
Mirëpo, në letër, fraksioni i Berishës brenda Partisë Demokratike, nuk do të jetë pjesë e koalicionit.
Nën argumentimin se simbolet e Partisë Demokratike, nuk mund të përdoren përveçse nga Partia Demokratike. Pra, Komisioni i Rithemelimit, de jure nuk do të jetë pjesë e zgjedhjeve, por de facto po.
Përfaqësuesi ligjor i LSI-së në KQZ, Altin Kaziaj, argumentoi se paraqitja e kërkesës për koalicion, ishte tërësisht legjitime.
Mirëpo, nga ana tjetër, përfaqësuesi i Partisë Demokratike, Marash Logu, replikoi menjëherë, duke cituar disa probleme me regjistrimin e koalicionit.
Dy elemente sipas tij, e pamundësonin regjistrimin. I pari, lidhej me faktin se në kohën kur është bërë kërkesa, më 31 janar 2022, LSI-ja nuk ka qenë ende e regjistruar si subjekt zgjedhor në KQZ.
I dyti, lidhej me përdorimin e simboleve të PD-së, të përmendura disa herë në kërkesë.
Mbi të parën, ishte Celibashi, ai i cili argumentoi se data nuk duhet të krijonte precedent për rrëzimin e kërkesës. Kjo, pasi LSI-ja është një parti legjitime. Mirëpo, ai e pranoi pretendimin e demokratëve për sa i përket përdorimit të simboleve.
Ishte pikërisht kjo arsyeja se pse Komisioneri, vendosi që Komisionin e Rithemelimit, të mos e lejonte të ishte pjesë e koalicionit në letër.
Po ashtu, edhe në fletën e votimit apo fushatën zgjedhore, koalicioni nuk do të mund të përdorë simbole të PD-së. Ky fakt, sërish, u soll në vëmendje nga Komisioneri, pasi mund të ngatërrojë votuesit.
Megjithatë, logoja e prezantuar si “Shtëpia e Lirisë”, mbetet e vlefshme për t’u përdorur nga koalicioni. Ndërsa, mbi kandidatët, do të diskutohet në seanca të mëtejshme.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com