Alcantara zbulon shkakun e krizës aktuale të Liverpool

Thiago Alcantara, mesfushori spanjoll i Liverpool-it, pranoi se përpjekja e dështuar e Reds për të fituar kurorën e katërfishtë (EFL Cup, FA Cup, Premier League dhe Champions League) sezonin e kaluar po i rëndon ata këtë sezon.

Në përpjekjen e tyre për katërfishin, Liverpool luajti çdo ndeshje të mundshme të sezonit, duke fituar Kupat e EFL dhe FA kundër Chelsea, ndërsa humbi finalen e Champions League kundër Real Madrid dhe përfundoi i dyti në Premier League, një pikë të vetme pas Manchester City.

Dy javë më parë, Jurgen Klopp theksoi faktin se ata kishin nënvlerësuar koston e të luajturit për të katër titujt sezonin e kaluar, me Thiago që tani i bën jehonë ndjenjave të trajnerit të tij.

“Nuk ka të bëjë vetëm me aspektet fizike”, tha Thiago për Daily Mail.

“Është diçka psikologjike, sepse ishim shumë pranë fitimit të të gjithave dhe thjesht e prekëm, por fatkeqësisht është zhdukur. Në momente të këqija, ne duhet të jemi bashkë si ekip”.

Pas barazimit ndaj Chelsea-t, Liverpool aktualisht është në vendin e nëntë në Premier League me 29 pikë, plot 10 pikë prapa vendeve të Ligës së Kampionëve.

Megjithatë, Thiago dëshiron të marrë çdo ndeshje, duke besuar se kjo është një qasje më e mirë për skuadrën për t’u ndjekur psikologjikisht.

“Ne shkojmë ndeshje pas ndeshje për të shtuar pikë që na ndihmojnë të jemi sa më lart”, ka thënë Thiago.

“Qëllimi ynë është ndeshja e radhës. Jo të jemi në top katërshe apo në Ligën e Evropës, vetëm ndeshja tjetër. Ka një rrugë të gjatë për të bërë në sezon. Jemi gjallë në Champions League dhe në FA Cup.

“Ne nuk jemi në pozicionin që duam në Premier League, por jemi ende atje dhe kjo është mirë”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.