Celsius, huadhënësi kryesor i kriptovalutave pezullon transaksionet, Bitcoin bie nën 25 mijë dollarë

Platforma kryesore e kreditimit të kriptomonedhave “Celsius”, njoftoi të hënën se po pezullonte të gjitha tërheqjet, për shkak të “kushteve ekstreme të tregut”, duke shkaktuar një shitje të madhe në tregun e kriptomonedhave me rënien e Bitcoin me më shumë se 9%.

Në një postim të hënën, Celsius tha se “po ndalonte të gjitha tërheqjet, shkëmbimet e monedhës dhe transferimet midis llogarive”, duke vënë në dukje se po e bënte këtë për t’i lejuar vetes të përmbushë të gjitha detyrimet e tërheqjes në të ardhmen.

Kompania tha se veprimi i saj do të stabilizojë likuiditetin dhe operacionet “ndërsa ne marrim hapa për të ruajtur dhe mbrojtur asetet” dhe shtoi se klientët e saj do të vazhdojnë të grumbullojnë shpërblime gjatë ngrirjes.

Sipas faqes së saj të internetit, Celsius pretendon se ka mbajtur 11.8 miliardë dollarë aktive deri më 17 maj, ka përpunuar 8.2 miliardë dollarë kredi dhe ka rreth 1.7 milionë klientë.

Pas njoftimit, vlera e vet tokenit të Celsius (CEL) ra me më shumë se 50%, dhe që nga mëngjesi i së hënës, ai po tregtohej nën 20 cent, nga 7 dollarë që ishte në qershorin e kaluar.

Njoftimi i Celsius shkaktoi gjithashtu një shitje në tregun më të gjerë të kriptomonedhave me Bitcoin, i cili arriti nën 25 mijë dollarë, niveli i tij më i ulët që nga dhjetori i vitit 2020.

Pezullimi i tërheqjeve vjen vetëm një ditë pasi themeluesi dhe CEO i Celsius, Alex Mashinsky, sulmoi kritikët në Twitter, duke i akuzuar ata për përhapjen e dezinformatave dhe FUD-it – një akronim i njohur kripto për “Frikë, Pasiguri, Dyshim”.

Janë ngritur pyetje në lidhje me platformat e kriptove si Celsius që premtojnë rendimente masive për klientët e tyre pas kolapsit të profilit të lartë muajin e kaluar të një monedhe tjetër stabile me rendiment të lartë, Terra dhe tokenit të saj shoqërues, Luna.

Sipas Financial Times, përcjell Albanian Post, Celsius u ndikua gjithashtu nga rënia e përgjithshme në tregun e kriptomonedhave në muajt e fundit me asetet e tij të përgjithshme, të cilat ranë nga një vlerë prej 24 miliardë dollarë në dhjetor 2021 në 11.8 miliardë dollarë muajin e kaluar.

Celsius drejton një nga operacionet më të mëdha të huadhënies së kriptove në botë, duke arritur të mbledhë 750 milionë dollarë fonde vitin e kaluar nga firma e investimeve si WestCap dhe menaxheri i fondit të pensioneve kanadez “Caisse de dépôt et placement du Québec”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.