Dy zjarre të mëdha shpërthyen pasditen e së dielës në Atika, raporton Kathimerini.
Më e hershmja, në jug të qytetit të Keratea, tashmë ka kaluar nëpër shtëpi dhe makina, por nuk është raportuar për viktima.
Erërat e forta po ndihmojnë në përhapjen e zjarreve. Në Keratea, zjarri i cili ka nisur rreth orës 13:00, është drejtuar në jug dhe mund të afrohet me qytetin bregdetar të Lavrios,
Deri më tani, zjarri në Keratea ka qenë duke u ndezur në zonat e banuara, por së shpejti mund të arrijë në një pyll të vogël. Zona ka pësuar zjarre në vitet e fundit.
Në veri të Athinës, një tjetër zjarr ka djegur në periferi të Stamata dhe autoritetet kanë dërguar së fundmi mesazhe urgjente për banorët që të evakuohen.
Afër 140 zjarrfikës dhe ekipe të tjera të shpëtimit, tetë helikopterë dhe nëntë avionë janë angazhuar për të shuar flakët.
Autoritetet kanë aktivizuar alarmin për evakuim, duke u bërë thirrje banorëve që të evakuohen nga gjashtë zona afër kryeqytetit grek, Athinës.
Zjarri në Athinë shpërtheu një ditë pasi një zjarr tjetër kishte shpërthyer në zonën e njëjtë, por që u vu nën kontroll nga zjarrfikësit.
Po ashtu, një zjarr shpërtheu në ishullin Serifos pasditen e së shtunës, por autoritetet arritën që ta vinin nën kontroll mëngjesin e së dielës.
“E gjithë pjesa jugperëndimore e Serifosit është djegur. Zjarri u ndal kur arriti në bregdet”, tha kryetari i Serifosit, Konstantinos Revintis.
Zjarri shkaktoi dëme nëpër shtëpi, depo dhe objekte të kultit, tha ai.
Ministria e Mbrojtjes Civile tha se pret zjarre me rrezik të lartë në Atika, Peloponez, Kretë, rajone që gjenden në veri dhe jug të Egjeut.
Sipas autoriteteve, më 29 qershor në mbarë Greqinë shpërthyen mbi 40 zjarre dhe shteti u përball me erëra që tejkaluan 100 kilometra në orë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
