Në Irlandë, aplikacioni i shkëmbimit të mesazheve, WhatsApp-i, është gjobitur me 225 milionë euro nga mbikëqyrësi i të dhënave në vend për shkelje të rregullave të privatësisë.
Agjencia e lajmeve, “BBC”, tregon se kjo është gjoba më e madhe e dhënë ndonjëherë nga Komisioni Irlandez i Mbrojtjes së të Dhënave dhe e dyta më e larta sipas rregullatorit evropian të mbrojtjes së të dhënave, GDPR-së.
Facebook-u, i cili zotëron aplikacionin e bisedave, ka selinë e vet në BE në Irlandë dhe rregullatori irlandez është autoriteti kryesor për gjigantin e teknologjisë në Evropë.
Nga ana tjetër, WhatsApp-i ka deklaruar se nuk pajtohet me vendimin, ashpërsinë e gjobës dhe se planifikon ta apelojë atë.
Gjoba lidhet me një hetim, i cili nisi në vitin 2018, nëse WhatsApp-i ishte mjaftueshëm transparent për mënyrën se si i trajton informacionet.
Për sa i përket çështjeve të përfshira, ato ishin shumë teknike, përfshirë nëse aplikacioni siguronte informacion të mjaftueshëm për përdoruesit se si përpunoheshin të dhënat e tyre dhe nëse politikat e tij të privatësisë ishin mjaft të qarta.
Dhe prej asaj kohe, politikat e ndjekura nga WhatsApp-i janë përditësuar disa herë.
“WhatsApp-i është angazhuar për të siguruar një shërbim të sigurt dhe privat”, ka thënë një zëdhënës i kompanisë.
Ai ka vijuar se “ne kemi punuar për të siguruar që informacioni që ofrojmë është transparent dhe gjithëpërfshirës dhe do të vazhdojmë ta bëjmë këtë. Ne nuk pajtohemi me vendimin në lidhje me transparencën që u siguruam njerëzve në vitin 2018 dhe dënimet janë krejtësisht jo-proporcionale”.
“BBC” sqaron se gjoba ka ardhur pasi rregullat e GDPR-së lejojnë gjoba deri në katër për qind të xhiros globale të kompanisë fyese.
Mbikëqyrësi irlandez ka zbuluar se i ka dorëzuar vendimin e marrë autoriteteve të tjera kombëtare të të dhënave, siç kërkohet nga GDPR-ja, “pas një hetimi të gjatë dhe gjithëpërfshirës” dhe se ka marrë kundërshtime nga tetë vende, përfshirë Gjermaninë, Francën dhe Italinë.
Disa nga vendet nuk u pajtuan me rregullatorin irlandez se cilat direktiva të veçanta të GDPR-së ishin thyer ose mbi mënyrën se si ishte llogaritur gjoba.
Edhe Bordi Evropian për Mbrojtjen e të Dhënave i ka thënë mbikëqyrësit irlandez në korrik që të ndryshojë gjetjen e saj, “të rivlerësojë” gjobën e saj të propozuar prej 30 deri në 50 milionë euro dhe të ndryshojë vendimin “duke përcaktuar një shumë më të lartë gjobe”.
Qortim zyrtar
Kjo “tregon se mbikëqyrësi irlandez është ende jashtëzakonisht jofunksional”, ka thënë mbrojtësi i privatësisë, Max Schrems, duke përshëndetur vendimin.
Ai ka shtuar se autoriteti “merr rreth 10 mijë ankesa në vit që nga viti 2018 dhe kjo është gjoba e parë e madhe”.
Dhe për shkak të apelit të planifikuar të WhatsApp-it, “në sistemin gjyqësor irlandez, kjo do të thotë që ne do të shohim vite para se të paguhet ndonjë gjobë”.
Megjithatë, mbikëqyrësi e ka qortuar zyrtarisht aplikacionin dhe e ka urdhëruar atë që “të sjellë përpunimin e tij në përputhje me rregulloret”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
