Ende nuk ka dakordësi totale mes dy grupimeve brenda Partisë Demokratike për kandidatin e përbashkët të zgjedhjeve lokale të vitit 2023.
E vetmja gjë që konfirmoi takimi mes deputetit Edi Paloka dhe ish-numrit dy të selisë blu Gazment Bardhi është “vullneti i përbashkët për diskutim”.
“Po vijojmë diskutimet”, deklaroi Bardhi për gazetarët pas takimit.
Takimi mes palëve zgjati rreth 1 orë e gjysmë.
I pari nga takimi ka dalë Gazmend Bardhi dhe pak pas tij edhe Edi Paloka.
“Nuk ka dështuar, është vullneti i përbashkët për të dalë me një kandidat”, u shpreh Paloka nga ana e tij.
Të dy deputetët janë mandatuar nga grupet respektive për t’u ulur në diskutime lidhur me kandidatin e përbashkët.
Kjo e fundit, u konfirmua më 10 tetor nga kreu i Grupit Parlamentar të PD-së, Enkelejd Alibeaj.
“Pas diskutimeve në Grupin Parlamentar të Partisë Demokratike, deputetët në mënyrë unanime shprehën vullnetin e plotë dhe të sinqertë për të gjetur format e duhura të bashkëpunimit për zgjedhjet lokale fillimisht duke nisur me të gjithë Partinë Demokratike dhe me çdo faktor opozitar”.
Më herët, kryedemokrati Sali Berisha zhvilloi një takim me drejtuesit e grupeve të punës të cilët po drejtojnë aksionin politik të kësaj force politike.
Berisha vërejti gjatë mbledhjes se aksioni politik i së djathtës do të ketë dy drejtime: Organizimi i primareve dhe i protestave.
Në një deklaratë për mediat, kreu i Partisë së Lirisë, Ilir Meta deklaroi se Partia Demokratike duhet të qartësojë sa më shpejt se cilët do të jenë kandidatët përballë mazhorancës socialiste.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
