Janë tetë vatra aktive zjarri në gjithë Shqipërinë.
Situata më kritike paraqitet në fshatin Dukat i Ri, në Gadishullin e Karaburunit, ku era favorizuese ka ndikuar në përhapjen e flakëve dhe shtimin e intensitetit të tyre.
Kjo vatër paraqitet rrezikshmëri, pasi ka përhapje në drejtim të Parkut Kombëtar të Llogarasë. Prej orëve të para të mëngjesit të së hënës, 9 gushtit, ka rinisur operacioni edhe nga ajri.
Një vatër tjetër kritike është ajo në Majën e Rrunës, mbi tunelin e Kalimashit, ku vijon puna për mbajtjen nën kontroll, në mënyrë që flakët të mos kërcënojnë banesat.
Në fshatin Thirrë në Fan të Mirditës, zjarri nuk paraqet rrezik për banesa, ndërsa po vijon puna për shuarjen e tij.
Gjithashtu, zjarri në fshatin Munellë-Domgjon është izoluar në njërin krah, por po vijon puna në krahun tjetër, ku ende ka prani flakësh.
Prej ditës së djeshme po punohet për shuarjen e flakëve në masivin me pisha në fshatin Krushovë, në njësinë administrative Voskopojë. Prej orëve të para janë shtuar forcat e ndërhyrjes nga FA, zjarrfikësit, si dhe struktura të tjera të Bashkisë Korçë e bashkive fqinje.
Situatë e vështirë zjarri ka qenë dje, në fshatin Patalej, njësia administrative Kolsh, bashkia Mirditë. Sot vazhdon zjarri në shkurre, ndërsa janë shtuar forcat operacionale.
Në fshatin Corrush në Mallakastër janë izoluar dy vatra, por puna vijon për izolimin e flakëve në tre vatra të tjera aktive, të cilat janë në terren të vështirë.
Në fshatin Bogë, njësia administrative Shkrel është aktivizuar një vatër zjarri mbrëmjen e djeshme. Nuk paraqet rrezik për banesat.
Një vatër zjarri është njoftuar në Parkun e Tomorrit, në lartësinë mbi 1500 m, por situata po ndiqet nga forcat vendore.
Monitorimi vijon në gjithë vendin për të shmangur përshkallëzim të flakëve.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
