Bashkimi Evropian është nën presion të jashtëzakonshëm për të kufizuar çmimin e gazit natyror të importuar për të përmbajtur kostot e energjisë.
Por shumë nga kompanitë që bëjnë pasuri duke shitur gaz të lirë të Shteteve të Bashkuara të Amerikës në kontinent janë evropiane.
Gazi natyror i lëngshëm (LNG) i ngarkuar në cisterna në portet e SHBA-ve kushton gati katër herë më shumë në anën tjetër të Atlantikut, kryesisht për shkak të përçarjes së tregut të shkaktuar nga një humbje pothuajse totale e dërgesave ruse pas pushtimit të Ukrainës.
Komisioni Evropian ka qenë nën presion për të hartuar një plan kufiri të çmimit të gazit, por disa vende, të udhëhequra nga Gjermania, shqetësohen se një masë e tillë mund t’i shtyjë transportuesit të dërgojnë ngarkesa me gaz diku tjetër.
Komisioni është gjithashtu ngurrues dhe propozimi i tij i publikuar të martën e 22 nëntorit vendos kërkesa të tilla sa që ato nuk u plotësuan as gjatë emergjencës së çmimeve të kësaj vere.
Por një pjesë e madhe e tregtisë është në duart evropiane, sipas eksportuesit më të madh të LNG në Amerikë.
“90 për qind e gjithçkaje që ne prodhojmë u shitet palëve të treta”, tha Corey Grindal, nënkryetar ekzekutiv për tregtinë në mbarë botën në “Cheniere Energy”
Cheniere, e cila këtë vit pa 70 për qind të LNG-së së saj të eksportuar të lundronte në Evropë, e shet gazin e saj në një skemë me çmim fiks bazuar në çmimin standard amerikan, të quajtur Henry Hub, i cili aktualisht është rreth 6 dollarë për milion njësi termike britanike.
Pavarësisht frikës se çdo kufi i BE-së do të dërgojë gaz për ofertuesit më të lartë në Azi dhe do të rezultojë në mungesa në të gjithë bllokun, Grindal dha një “jo” të fortë kur u pyet nëse një kufi do të kishte ndonjë ndikim në mënyrën se si Cheniere bën biznes me kompanitë evropiane.
“Bilanci ynë mbështetet nga ato kontrata afatgjata”, shtoi ai.
Kështu, nëse blerësit zgjedhin t’i tregtojnë ngarkesat e tyre të çmuara për fitime më të larta përtej Evropës pasi t’i marrin ato, ky është vendimi i tyre.
Diferenca midis çmimeve të gazit në SHBA dhe BE nuk ka kaluar pa u vënë re nga politikanët evropianë – por shumica e gishtave të drejtuar ka qenë te prodhuesit amerikanë dhe jo tek rishitësit më afër shtëpisë.
Marrë nga “Politico”, përshtatur për Albanian Post
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
