Protestat në Francë, Macron përgatitet të takohet me krerët e parlamentit

Presidenti i Francës Emmanuel Macron do të takohet me krerët e të dy dhomave të parlamentit të hënën, ndërsa protestat e dhunshme për vrasjen e adoleshentit Nahel nga policia po lehtësohen pas pesë netëve trazira që kanë parë mijëra të arrestuar dhe shkatërrim të gjerë.

Policia bëri 49 arrestime në mbarë vendin të dielën, raportuan mediat franceze, duke cituar ministrinë e brendshme, duke rënë ndjeshëm nga 719 arrestime një ditë më parë dhe 1 mijë e 300 të premten.

Macron do të takohet gjithashtu të martën me kryetarët e 220 qytetev të prekura nga protestat, tha zyra e tij, pas një takimi krize të dielën mbrëma me ministrat e qeverisë.

Dhuna në rënie vjen pas një apeli për qetësi nga gjyshja e Nahelit, 17-vjeçarit të vrarë të martën gjatë ndalimit të trafikut të policisë në një periferi të Parisit.

“Ndaloni trazirat, ndaloni së shkatërruari”, tha gjyshja, e quajtur Nadia, për “BFMTV”.

“Unë u them këtë atyre që po bëjnë trazira: mos i thyeni xhamat, mos sulmoni shkollat dhe autobusët. Ndalo. Janë nënat ato që marrin autobusë. Rebelët, kryesisht të mitur po përdornin Nahelin si justifikim”, tha ajo.

Të dielën, politikanët dënuan një sulm të së shtunës mbrëma, në të cilin rebelët përplasën një makinë të djegur në shtëpinë e Vincent Jeanbrun, kryebashkiaku i L’Haÿ-les-Roses, nëntë milje (15 km) në jug të Parisit, rreth orës 1:30 të mëngjesit, ndërsa familja ishte në gjumë.

Jeanbrun ishte në bashki në atë kohë, por gruaja e tij dhe një nga dy fëmijët e tij, pesë dhe shtatë vjeç, u plagosën teksa iknin. Gruaja e Jeanbrun pësoi një thyerje të këmbës.

Prokurori rajonal Stephane Hardouin hapi një hetim për tentativë vrasje të dielën, duke i thënë televizionit francez se një hetim paraprak sugjeroi se makina kishte për qëllim të përplaste shtëpinë dhe t’i vinte flakën.

Duke vizituar L’Haÿ-les-Roses të dielën, Elisabeth Borne, kryeministrja, denoncoi “një sulm të patolerueshëm” dhe u zotua që ata që janë përgjegjës nuk do t’i shpëtonin. Ndërsa situata ishte shumë më e qetë në përgjithësi, sulmi ishte veçanërisht tronditës, tha ajo.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.