Trupat e dy burrave, në zonën afër vendit ku dyshohet se gazetari britanik Dom Phillips dhe aktivisti indigjen Bruno Pereira u zhdukën 10 ditë më parë, janë gjetur nga Policia në Amazonën Braziliane.
Shefi i policisë rajonale, Eduardo Fontes, në një konferencë shtypi mbrëmjen e të mërkurës, tha se një nga dy burrat e arrestuar në lidhje me zhdukjen e tyre kishte pranuar se i kishte vrarë ata.
“Të martën ai na informoi për vendndodhjen ku u varrosën trupat dhe premtoi se do të shkonte me ne sot në vend, në mënyrë që të konfirmonim se ku ishin varrosur trupat”, detajoi Fontes për gazetarët.
Ky informacion, solli një fund të trishtuar, pas një kërkimi 10-ditor që ka tmerruar kombin, duke nënvizuar rreziqet në rritje me të cilat përballen ata që guxojnë ta mbrojnë mjedisin e Brazilit dhe komunitetet indigjene, të cilat janë përballur me një sulm historik nën presidentin e ekstremit të djathtë të vendit, Jair Bolsonaro.
Vendndodhja e identifikuar nga i dyshuari ishte 1 orë e 40 minuta me varkë nga qyteti lumor i Atalaia do Norte dhe 3.1 km të tjera (1.9 milje) në këmbë në pyll të dendur.
Pas një operacioni njëditor, ku përfshihej ushtria, marina dhe forcat policore, trupat largoheshin nga ajo zonë, e njohur si Lago do Preguiça, gjatë natës.
Të shoqëruar nga trupat e ushtrisë, ata u çuan me varkë prapa lumit Itaquaí në Atalaia do Norte, ku Phillips dhe Pereira kishin filluar udhëtimin e tyre të fundit.
Shumë vendas u mblodhën në portin e qytetit për të parë ndërsa oficerët me veshje kamuflazhi ngarkuan dy çantat e zeza të trupit në pjesën e pasme të një makine të policisë federale, e cila u nis në një flakë dritash të kuqe dhe blu.
“Tani do të identifikojmë mbetjet njerëzore, me dinjitetin më të madh të mundshëm”, tha Fontes.
“Kur të vërtetohet se eshtrat janë të Dom Phillips dhe Bruno Pereira, ato do t’u dorëzohen familjeve”.
Lajmi u përshëndet nga gruaja e Phillips, Alessandra Sampaio.
“Edhe pse jemi ende në pritje të konfirmimeve përfundimtare, ky rezultat tragjik i jep fund ankthit të mosnjohjes së vendndodhjes së Dom dhe Brunos”, shkroi ajo në një deklaratë.
“Tani mund t’i sjellim në shtëpi dhe t’i themi lamtumirë me dashuri. Sot, ne gjithashtu fillojmë kërkimin tonë për drejtësi. Shpresoj që hetimet të shterojnë të gjitha mundësitë dhe të sjellin përgjigje përfundimtare për të gjitha detajet përkatëse sa më shpejt të jetë e mundur”.
Fontes tha se ekipet e kërkimit planifikonin të ktheheshin në vend të enjten për të gjetur varkën e burrave.
Konferenca për shtyp u mbajt në Manaus, kryeqyteti i shtetit Amazonas, ku një sërë zyrtarësh ushtarakë dhe policorë uruan veten për punën e bërë, përpara se të njihnin me vonesë rolin e luajtur nga indigjenët që ndihmuan në udhëheqjen e kërkimit.
Në Atalaia do Norte, Eliseio Marubo, një avokat indigjen dhe mik i ngushtë i Pereira-s tha se “ndiej një dhimbje të papërshkrueshme sepse kam humbur një vëlla, kam humbur një pjesë të historisë sime”.
Hetimi u shoqërua me pengesa, nga reagimi i ngadaltë i ushtrisë dhe ekipeve të kërkimit të marinës, te veprimet e kritikuara rëndë të Ambasadës Braziliane në Londër, e cila i tha familjes së Phillips në MB se trupi i tij ishte gjetur, vetëm për të tërhequr deklaratë më vonë.
Marrë nga The Guardian, përshtatur për Albanian Post!
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
