PE-ja do të miratojë Rezolutë që Serbia të vendosë sanksione ndaj Rusisë – përfshihet edhe dialogu me Kosovën

Parlamenti Evropian do t’i bëjë thirrje përmes një Rezolute autoriteteve të sapozgjedhura në Serbi “të tregojnë përkushtim të vërtetë ndaj vlerave të Bashkimit Evropian dhe të harmonizohen me vendimet dhe qëndrimet e BE-së në politikën e jashtme dhe të sigurisë, duke përfshirë sanksionet kundër Rusisë”, tha për Radion Evropa e Lirë, raportuesi për Serbinë, Vladimir Bilçik, autor i Rezolutës.

Sipas Rezolutës, Parlamenti Evropian do të shprehë keqardhjen për faktin se Serbia nuk iu përmbajt sanksioneve të BE-së pas pushtimit rus të Ukrainës.

Shtohet se eurodeputetët janë “thellësisht të shqetësuar” për përhapjen e dezinformatave për agresionin rus kundër Ukrainës, dhe për këtë arsye u bëjnë thirrje autoriteteve serbe dhe Komisionit Evropian që të mbështesin infrastrukturën për luftën kundër dezinformatave dhe kërcënimeve të tjera hibride.

PE-ja do të përdorë Rezolutën për t’u bërë thirrje autoriteteve serbe që të veprojnë kundër glorifikimit të kriminelëve të dënuar të luftës dhe të ndalojnë çdo retorikë dhe veprim që cenon integritetin e vendeve fqinje dhe rrezikon stabilitetin dhe pajtimin rajonal.

Ajo shpreh keqardhjen për presionin e vazhdueshëm mbi gjyqësorin dhe mohimin publik të vendimeve ndërkombëtare për krimet e luftës dhe i bën thirrje shumicës së sapozgjedhur që të forcojë garancitë për pavarësinë dhe efikasitetin e gjyqësorit si çështje prioritare.

Lidhur me zgjedhjet e fundit presidenciale dhe parlamentare në Serbi, drafti mirëpret pjesëmarrjen e shtuar të votuesve dhe kthimin në një parlament pluralist, por dënon atë që thuhet se është një mjedis politik shumë i polarizuar dhe një fushatë e karakterizuar nga pluralizmi i kufizuar mediatik dhe presioni ndaj votuesve.

“Keqardhje dhe për moslejimin e votimit të serbëve në Kosovë për zgjedhjet serbe”

Rezoluta u shpreh keqardhje edhe për vendimin e Qeverisë së Kosovës për të refuzuar propozimin që do të mundësonte mbledhjen e fletëvotimeve me të drejtë vote në territorin e Kosovës për zgjedhjet e prillit, siç ishte rasti më parë.

Po ashtu u kujton autoriteteve serbe se progresi në dialogun për normalizimin e marrëdhënieve me Kosovën do të përcaktojë ritmin e negociatave për anëtarësim.

Ajo rithekson mbështetjen  për dialogun Beograd-Prishtinë dhe rëndësinë e angazhimit konstruktiv ndërmjet autoriteteve serbe dhe kosovare me qëllim arritjen e një marrëveshjeje gjithëpërfshirëse ligjërisht të detyrueshme për normalizimin, e cila është thelbësore për të dyja palët për të avancuar në rrugët e tyre evropiane.

Rezoluta gjithashtu bën thirrje për respektimin dhe zbatimin e plotë të të gjitha marrëveshjeve të mëparshme, përfshirë Asociacionin e Komunave me Shumicë Serbe.

Projekt-rezoluta i kushton hapësirë ​​të veçantë situatës në media dhe shpreh keqardhjen për lirinë e kufizuar të medias dhe “abuzimin e medias për përfitime të padrejta politike”, si dhe sulmet ndaj kundërshtarëve politikë dhe përhapjen e dezinformatave.

Ajo përsërit shqetësimin e tij për përparimin e kufizuar në luftën kundër korrupsionit dhe krimit të organizuar dhe i kërkon Serbisë të intensifikojë përpjekjet për t’i trajtuar këto çështje në mënyrë efektive.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.