Autoritetet meksikane, raportuan se kanë gjetur 19 trupa të qëlluar me armë dhe të djegur pranë Teksasit, në Shtetet e Bashkuara të Amerikës.
Sulmi ka ndodhur në një zonë që ka mosmarrëveshje të dhunshme territoriale midis grupeve të krimit të organizuar.
Zyra e prokurorit të shtetit të Tamaulipas në Meksikë, tha të shtunën, se trupat u zbuluan përgjatë një rruge të Camargo-s, pasi banorët raportuan një automjet të djegur.
Autoritetet gjetën dy automjete të djegura. Aty ishin dhe eshtrat e 19 viktimave bashkë me disa armë.
Të 19 viktimat ishin qëlluar, por plumbat nuk u gjetën në vend, duke bërë që hetuesit të besonin se ishin vrarë diku tjetër.
“Në njërin nga furgonët kishte dy trupa në sediljet e përparme, një trup tjetër në anën e derës së shoferit. Një tjetër ndodhej në anën e derës së pasagjerit dhe 15 trupa në pjesën e pasme të automjetit”, ishte deklarata zyrtare e policisë.
Një zyrtar i Camargo-s, i cili kërkoi anonimitet për shkak të shqetësimeve të sigurisë, tha se vrasjet ndodhën të premten, por njerëzit kishin frikë t’i raportonin ato.
Historitë e karteleve në Meksikë
Camargo, një qytet me rreth 15 mijë njerëz, kufizohet me Teksasin dhe shtetin meksikan të Nuevo Leon-it.
Në janar të vitit 2019, në qytetin Tamaulipas u gjetën 24 kufoma, 15 prej të cilave ishin djegur.
Në gusht të vitit 2010, një grup prej 72 migrantësh të padokumentuar u vranë në San Fernando. Autoritetet thanë se masakra u krye nga karteli Zetas, një nga më të fuqishmit në atë kohë.
Tamaulipas, në bregdetin e Gjirit të Meksikës, është rruga më e shkurtër për në SHBA, por edhe më e rrezikshmja për shkak të pranisë së bandave kriminale, të cilat rrëmbejnë, zhvatin dhe vrasin migrantë
Dhuna e lidhur me kartelet e ka shqetësuar Meksikën që nga viti 2006, ku ka pasur 300 mijë vrasje./AlbanianPost.com
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com