Kosova

“Kushdo që fiton në Shqipëri, do të jetë mbështetës i Kosovës”


Nait Hasani, ambasador i Kosovës në Shqipëri

Ambasadori i Kosovës në Shqipëri, Nait Hasani, në një intervistë për Klan Kosovën ka thënë se “kushdo që vihet në krye të Qeverisë së re të Shqipërisë, mbështetja ndaj Kosovës, është e padiskutueshme”.

”Shqipëria në çfarëdo rrethane ka qenë mbështetësja kryesore e Kosovës. Edhe PD kur ka qenë edhe PS që është, por edhe tani kushdo që fiton ka me qenë mbështetëse, aleate kryesore e Kosovës”.

”Shqipëria është një aleate e fuqishme, një mbështetëse e fuqishme e Kosovës, një shtet që përbën një komb të përbashkët me dy shtete, kështu që kushdo që vie do të jetë i njëjtë në mbrojtje të interesave të Kosovës në arenën ndërkombëtare dhe brenda qytetarëve të saj”.

Ai ka shtuar se ka përcjellur me vëmendje fushatën zgjedhore atje, dhe sipas tij kjo është një përvojë e re për të.

”Ne si mision diplomatik, kemi përcjellur vazhdimisht, nga fillimi i fushatës, edhe parafushatën në Shqipëri, mes partive politike të cilët garojnë për Kuvendin e Shqipërisë”.

Hasani thotë se për të ka qenë përvojë e re, megjithatë sipas tij “Shqipëria ka 30 vjet që garon për Kuvendin me partitë e ndryshme që kanë dalë nga ish-sistemi komunist dhe PD po ashtu”.

”Për ne janë të rëndësishme zgjedhjet e tashme, të cilat kanë një mundësi më të mirë të përgatitjes profesionale të zgjedhjeve, të cilat edhe KQZ-ja me vendimet e veta që nga një pikë këtu është si test i parë, votimi elektronik”.

Sipas tij “ka një avancim të madh të Shqipërisë në çështjen e votimit, ndërsa tek partitë politike të cilat mbajnë fushatën zgjedhore, kemi nuanca të ndryshme të prezantimit”.

”Është një fushatë mjaftë me karakteristika të veçanta të të dy blloqeve që janë, dhe kjo ju jep përparësi qytetarëve të zgjedhin mundësitë e votimit për partitë dëshiruese që ata parapëlqejnë se do t’ua mbrojnë interesat e tyre”, ka përfunduar Hasani.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.

/Albanianpost.com


Lajmet kryesore