Kreu i KKSH-së i kërkon Universitetit të Beogradit hapjen e degës së gjuhës shqipe në Preshevë
Kryetari i Këshillit Shqiptar në Serbi (KKSH), Nevzad Lutfiu, ka kërkuar nga Universiteti i Beogradit hapjen e degës së gjuhës shqipe në Preshevë.
Lajmi është bërë i ditur nga vetë Lutfiu, përmes një postimi në Facebook.
“Sot përmes një shkrese iu drejtova Universitetit të Beogradit-Fakultetit Filologjik, Katedrës së Albanologjisë, për hapjen e degës së gjuhës shqipe në Preshevë”, ka shkruar ai.
Kreu i KKSH-së ka bëtë të ditur se me kërkesë të njëjtë i është drejtuar edhe Ministrisë së Arsimit të Serbisë.
“Përveç kësaj kërkova edhe takim për t’i konkretizuar gjërat. Kjo katedër merr kuptimin e plotë kur e ka të hapur degën e saj në Preshevë, në qytetin që është i banuar me mbi 95 për qind shqiptarë”.
Përveç kësaj, Lutfiu ka thënë se hapja e kësaj dege përbën interes edhe për qytetet e rajonit të cilat janë afër Preshevës e që nuk e kanë këtë fakultet.
Shqiptarët që jetojnë në Luginë të Preshevës janë të shtypur sistematikisht nga institucionet e Serbisë.
Madje, atyre nuk iu lejohet as përdorimi i flamurit kombëtar.
Së fundmi një nga çështjet që është ngritur edhe në Senatin amerikan është pasivizimi i adresave që Serbia po i bënë shqiptarëve atje, posaçërisht në Medvegjë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com