Presidenti i Bankës Botërore, David Malpass po përballet me presion në rritje për të dhënë dorëheqjen.
Kritikat nga zyrtarët dhe grupet mjedisore për refuzimin e tij për të thënë nëse beson në ngrohjen globale të shkaktuar nga njerëzit dhe në rekordin e bankës në financat e lidhura me klimën, janë në rritje.
Kjo pasi ai ka shmangur dhënien e një përgjigjeje të qartë tre herë gjatë një ngjarjeje të javës së klimës në New York, kur u pyet nëse e pranonte realitetin e ndryshimit të klimës të drejtuar nga njeriu.
Për këtë ka thënë se nuk ishte “shkencëtar”.
Më vonë, Malpass u përpoq të ndryshonte kursin, duke thënë se ishte “e qartë se emetimet e gazit serrë vijnë nga burime të krijuara nga njeriu” dhe se nuk e mohonte këtë.
Por kthesa pasoi një breshëri kritikash ndaj tij.
Banka ofron kredi dhe grante për vendet më të varfra dhe shihet si thelbësore për shpërndarjen e parave në botën në zhvillim për të ndihmuar në kufizimin e ngrohjes globale teksa ekonomitë e saj rriten.
Është ofruesi më i madh i financave shumëpalëshe të lidhura me klimën. Por ajo nuk iu bashkua vendeve të shumta dhe bankave të tjera të zhvillimit që u zotuan vitin e kaluar për t’i dhënë fund financimit publik për qymyrin, naftën dhe gazin jashtë shtetit deri në fund të vitit 2022.
Sakaq, plani i tij klimatik nuk përfshin një afat kohor për heqjen graduale të financimit të karburanteve fosile direkte dhe indirekte.
Pakënaqësia në rritje ndoshta do të grumbullojë presion mbi aksionerët e bankës, vendet anëtare, në prag të samitit të klimës COP27 të OKB-së në nëntor. SHBA-të janë aksioneri më i madh dhe tradicionalisht emëron presidentin e Bankës Botërore.
Malpass u emërua nga ish-presidenti amerikan Donald Trump. Mandati i tij do të përfundojë në prill 2024.
Marrë nga “Financial Times”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.comLajmet kryesore
-
Ali Ahmeti ‘Qytetar Nderi’ i Tiranës, Rama: Është ndër shqiptarët më të mirë të historisë kombëtare
-
‘Kuvendi shkeli ligjin për votën e Diasporës’, Alibeaj: Çështja duhet të shkojë në SPAK
-
Versioni i Trump: Sërish dhunë nëse nuk fitoj? Varet
-
Shqipëria drejt prodhimit të dokumenteve digjitalë të identifikimit