Mijëra euro janë shqiptuar nga Paneli Zgjedhor për Ankesa dhe Parashtesa (PZAP), për subjektet politike të cilat kanë thyer heshtjen zgjedhore në zgjedhjet lokale të mbajtura të dielën e 17 tetorit.
Lëvizja Vetëvendosje është dënuar me dy mijë e 400 euro nga PZAP.
PZAP e ka pranuar ankesën e parashtruar nga Lidhja Demokratike e Kosovës, kundër LVV-së, ku kësaj të fundit i është shqiptuar gjoba prej një mijë e 200 euro “në emër të shkeljes së Kodit të Mirësjelljes për subjektet politike- thyerja e heshtjes zgjedhore”.
“Detyrohet subjekti politik Lëvizja Vetëvendosje me seli në Lipjan, që gjobën e shqiptuar si në pikën I të dispozitivit të këtij vendimi ta paguajë në afat prej 15 ditëve nga dita e plotfuqishmërisë së këtij vendimi, nën kërcënim të shqiptimit të dënimit shtesë”, thuhet në vendimin e PZAP-së.
Por, kjo nuk ishte ankesa e vetme e LDK-së kundër LVV-së.
PZAP ka pranuar edhe një ankesë tjetër nga LDK-ja.
“Pranohet ankesa nga LDK me seli në Prishtinë, ndërsa Lëvizjes Vetëvendosje me seli në Prishtinë, i shqiptohet dënimi me gjobë në lartësi prej një mijë e 200 euro për shkak të shkeljes së Kodit të Mirësjelljes për subjektet politike, Mbështetësit e tyre dhe Kandidatët- vendosja e materialit zgjedhor në hapësirë publike-trafo elektrike”, thuhet në vendim.
Ndërsa, pas kërkesës së BIRN-it dhe Interneës Kosova, LDK-ja dega në Lipjan, është gjobitur më dy mijë e 500 euro.
LDK-së i është shqiptuar edhe një gjobë tjetër në vlerë prej 800 euro – pas ankesës së LVV-së.
Ndërsa, një mijë e 200 euro gjobë i janë shqiptuar Partisë Demokratike të Kosovës, pas ankesës së Lëvizjes Vetëvendosje.
Po ashtu, me kërkesë të PDK-së në Skenderaj, i është shqiptuar gjobë në vlerë prej një mijë e 800 eurosh Bekim Jasharit, kandidat i pavarur për kryetar të Skenderajt.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
