John Kerry i ka kërkuar Kinës që të kthehet në tryezën e negociatave me SHBA-të për krizën klimatike.
E gjitha për të nisur progresin e ngecur global në uljen e emetimeve të gazeve serrë.
I dërguari i posaçëm për klimën pranë presidentit amerikan Joe Biden ka treguar se Kina përbën “30 për qind të të gjitha emetimeve”.
Gjatë verës, marrëdhëniet midis SHBA-ve dhe Kinës u zhytën në krizë kur Nancy Pelosi, kryetarja e Dhomës së Përfaqësuesve dhe demokratja e tretë më e lartë në qeveri, vizitoi Tajvanin.
Çka u konsiderua si një provokim i madh nga Pekini, i cili pretendon sovranitetin mbi ishujt e diskutueshëm dhe marrëdhëniet diplomatike u prishën.
Por dështimi i bashkëpunimit të dy emetuesve më të mëdhenj në botë ka krijuar probleme për veprimin global të klimës.
Sipas Kerry-t, të dyja qeveritë duhet të bashkëpunojnë.
“Mendoj se Kina dhe SHBA-të duhet të punojnë së bashku në mënyrë të pashmangshme për të bërë gjërat që duhet të bëjmë për të fituar këtë betejë”, ka thënë ai.
“Jam vërtet shumë i shqetësuar për ndërprerjen që ka ndodhur për shkak të ngjarjeve që nuk kanë të bëjnë fare me klimën”, ka shtuar ai.
Në teori, ngjarja e Kinës me SHBA-në nuk duhet të ndikojë në negociatat për krizën klimatike.
Por Kerry ka thënë se Kina në fakt kishte ndërprerë negociatat me SHBA-të për çështjet klimatike, si dhe për çështje të tjera.
“Klima është një çështje universale, një kërcënim universal. Pa ideologji politike, pa parti politike. Nuk përfaqëson konkurrencën globale. Përfaqëson një kërcënim global për botën, të cilin dy emetuesit më të mëdhenj dhe dy ekonomitë më të mëdha mund të përfitojnë shumë duke u bashkuar dhe duke bashkëpunuar në përpjekje për ta përballuar atë”.
Prishja midis dy vendeve ka ardhur pikërisht në kohën kur bashkëpunimi mes tyre dukej më premtues sesa kishte qenë për vite me radhë.
Në samitin e OKB-së për klimën Cop26 në Glasgow nëntorin e kaluar, të dy vendet habitën vëzhguesit me njoftimin e papritur të një pakti dypalësh.
Ata ranë dakord të punojnë në teknologji të pastër, metan dhe mënyra të tjera për të reduktuar emetimet.
“Ne me të vërtetë donim të bashkëpunonim së bashku. Ne po planifikonim një negociatë të madhe dhe homologu im ishte shumë i qartë se donte të arrinte diçka”, ka treguar Kerry.
Që nga Cop26, perspektiva për përparimin global mbi klimën është zbehur me luftën në Ukrainë, e cila ka kthyer disa vende drejt qymyrit dhe ka nxitur investime të reja në gaz dhe naftë.
Kjo e bën edhe më kritike mungesën e negociatave midis dy emetuesve më të mëdhenj në botë.
Ftohja e Kinës për bisedimet për klimën nuk do të shkatërronte përparimin në Cop27, samiti dy-javor i OKB-së për klimën që do të zhvillohet në Egjipt muajin e ardhshëm.
Megjithatë, sipas Kerry-t, do të shkaktonte probleme.
Kina ende mund të ndërmarrë veprime të forta vetë, sipas tij.
Vendi ka një rekord të tejkalimit të objektivave për energjinë e rinovueshme dhe reduktimit të karbonit në krahasim me prodhimin e tij ekonomik.
Strategjia e SHBA-ve për Cop27 është ajo që vendet të vendosin politika dhe masa për të përmbushur premtimet e tyre ekzistuese dhe të ndërmarrin objektiva të reja aty ku ato ekzistuese janë shumë të dobëta.
Kerry ka thënë se ishte ende optimist për objektivin global për kufizimin e rritjes së temperaturës në 1.5 gradë Celsius mbi nivelet para-industriale, fokusi i Cop26.
Ai ka vënë në dukje kërkimin nga Agjencia Ndërkombëtare e Energjisë në bisedimet që treguan nëse të gjitha premtimet e bëra në Cop26 do të përmbusheshin, bota do të arrinte 1.8 gradë Celsius ngrohje.
Këto premtime janë bërë nga vendet përgjegjëse për rreth dy të tretat e PBB-së globale, kështu që nëse e treta e mbetur mund të sillet për të ndjekur një kufi të temperaturës 1.5 gradë Celsius, qëllimi do të ishte në horizont.
Për të, vendet duhet të organizohen për të përshpejtuar ambiciet duke bërë njoftime për përparimin e tyre.
Ai nuk pret një përparim të rëndësishëm në Cop27 dhe asnjë vendim të vetëm të madh që do të ndryshonte rrjedhën e krizës klimatike, por shpreson për një sërë iniciativash nga vendet dhe një vullnet për përparim në uljen e emetimeve.
Marrë nga “The Guardian”, përshtatur për “Albanian Post”.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
